मुंबई काँग्रेसची ईडीच्या कार्यालयावर धडक

मुंबई काँग्रेसची ईडीच्या कार्यालयावर धडक
नॅशनल हेराल्डप्रकरणी मोर्चा; मोदी सरकारवर टीका

सकाळ वृत्तसेवा
​मुंबई, ता. १७ : नॅशनल हेराल्डप्रकरणी न्यायालयाने दिलेल्या निकालानंतर मुंबई काँग्रेसने आक्रमक पवित्रा घेतला आहे. केंद्र सरकारकडून ईडीचा वापर राजकीय सूडबुद्धीने केला जात असल्याचा आरोप करीत, मुंबई काँग्रेस अध्यक्षा खासदार वर्षा गायकवाड यांच्या नेतृत्वाखाली आज दक्षिण मुंबईतील ईडी कार्यालयावर धडक मोर्चा काढण्यात आला. या वेळी काँग्रेस कार्यकर्त्यांनी भाजपविरोधात जोरदार घोषणाबाजी केली.
‘‘सोनिया आणि राहुल गांधी यांना चौकशीच्या नावाखाली नाहक त्रास देण्यात आला. आता न्यायालयाने निकाल दिला असून, मोदी सरकारने त्यांची माफी मागावी,’’ अशी मागणी खासदार वर्षा गायकवाड यांनी केली. त्या पुढे म्हणाल्या की, स्वातंत्र्यलढ्यात बलिदान देणाऱ्या काँग्रेस नेतृत्वाची बदनामी करण्याचे पाप भाजपने करू नये; अन्यथा काँग्रेसचा कार्यकर्ता रस्त्यावर उतरून चोख उत्तर देईल.
...
दुटप्पीपणाचा आरोप
राहुल गांधी यांची खासदारकी २४ तासांत रद्द करणाऱ्या यंत्रणा, दोन वर्षांची शिक्षा कायम झालेल्या क्रीडामंत्री माणिकराव कोकाटे यांची आमदारकी रद्द का करीत नाहीत, असा सवाल वर्षा गायकवाड यांनी विचारला. तसेच पुण्यातील १,८०० कोटींच्या जमीन घोटाळ्यात उपमुख्यमंत्री अजित पवार यांचे पुत्र पार्थ पवार यांची ९९ टक्के भागीदारी असतानाही त्यांना वाचवले जात असल्याचा गंभीर आरोपही त्यांनी केला.
​...
कार्यकर्ते आक्रमक
मोर्चात माजी मंत्री अस्लम शेख, सचिन सावंत, डॉ. ज्योती गायकवाड यांच्यासह शेकडो कार्यकर्ते सहभागी झाले होते. पोलिसांनी बॅरिकेड्स लावून मोर्चा अडवण्याचा प्रयत्न केला; मात्र कार्यकर्त्यांनी आक्रमक पवित्रा घेतला. शेवटी पोलिसांनी वर्षा गायकवाड यांच्यासह प्रमुख नेत्यांना ताब्यात घेतले आणि नंतर त्यांची सुटका करण्यात आली. ‘ईडी ही मोदींच्या इशाऱ्यावर नाचणारी यंत्रणा बनली आहे,’ असा आरोप या वेळी उपस्थित नेत्यांनी केला.