स्वस्त घराच्या प्रलोभनाने पोलिस अधिकाऱ्यालाच गंडा

स्वस्त घराच्या प्रलोभनाने पोलिस अधिकाऱ्यालाच गंडा

मुंबई, ता. १७ ः स्वस्तात घर देण्याचे प्रलोभन दाखवून एकाने चक्क मुंबई पोलिस दलातील एका अधिकाऱ्यालाच पाच लाखांचा गंडा घातला. विशेष म्हणजे तक्रारदार पोलिस अधिकारी गुन्हे शाखेच्या विशेष कक्षात नियुक्त आहे.
याप्रकरणी आग्रीपाडा पोलिसांनी हरीश शेट्टी नावाच्या आरोपीविरोधात मंगळवारी गुन्हा नोंदवला. पोलिसांनी दिलेल्या माहितीनुसार, तक्रारदार गुन्हेगारी गुप्तवार्ता विभागात (सीआययू) उपनिरीक्षकपदी नियुक्त असून, वरळी पोलिस वसाहतीत राहतात. २००९मध्ये त्यांची ओळख शेट्टीसोबत झाली. शहरातील अनेक बांधकाम व्यावसायिक, विकासक परिचित असल्याचे त्याने भासवले. विक्रोळीत ५५० चौरस फुटांची सदनिका ४५ लाख रुपयांमध्ये उपलब्ध करून देण्याचे प्रलोभन शेट्टीने दाखवले. या व्यवहारासाठी २०२३मध्ये त्याने तक्रारदाराकडून सुमारे पाच लाख रुपये घेतले; मात्र त्यानंतर त्याने संपर्क तोडला. तक्रारदाराने शेट्टीबाबत चौकशी केली असता त्याच्याविरोधात शहरातील विविध पोलिस ठाण्यात फसवणुकीचे गुन्हे नोंद असून, त्यातील एका गुन्ह्यात तो अटकेत असल्याचे समजले. या गुन्ह्यातून जामिनावर सुटताच तक्रारदाराने शेट्टीकडे पैशांची मागणी केली; मात्र त्याने टाळाटाळ सुरू करताच तक्रारदाराने पोलिस ठाण्यात तक्रार दिली.