मुंबईत राष्ट्रवादी काँग्रेस देणार युवकांना संधी

मुंबईत राष्ट्रवादी काँग्रेस
देणार युवकांना संधी

शरद पवार गटाची बैठक

मुंबई, ता. १७ : मुंबई महापालिकेच्या निवडणुकीसाठी राष्ट्रवादी काँग्रेस (शरद पवार गट) पूर्ण ताकदीने मैदानात उतरणार आहे. मुंबईत पक्षाचा प्रभाव असलेली ठिकाणे निवडून सर्वच ठिकाणांवर तरुण आणि युवकांना संधी देण्यासाठी प्राधान्य दिले जाणार आहे. आज निवडणुकीच्या तयारीसंदर्भात पक्षाचे अध्यक्ष शशिकांत शिंदे यांच्या अध्यक्षतेखाली झालेल्या बैठकीत यावर चर्चा झाली.

दुसरीकडे मुंबईत २०१७ मध्ये पक्षाचे एकूण नऊ नगरसेवक होते. त्यापैकी दोन नगरसेवक सध्या पक्षाकडे उरले आहेत. यात घाटकोपर येथील राखी जाधव आणि विक्रोळीच्या मनीषा रहाटे यांचा समावेश आहे. उर्वरित दोन नगरसेवक राष्ट्रवादी काँग्रेसच्या अजित पवार गटांकडे आणि पाच एकनाथ शिंदे गटाच्या शिवसेनेत गेले आहेत. तरीही पक्षाची विक्रोळी, घाटकोपर, पवई, अंधेरी, दिंडोशी, वडाळा, चेंबूर, मानखुर्द, कालिना, कुर्ला आणि वांद्रे आदी परिसरात मोठी वोटबँक आहे. मुंबईत या भागात शरद पवार आणि त्यांच्या पक्षाला मानणारा खूप मोठा मतदार असून, विधानसभा आणि लोकसभा निवडणुकीत यातील काही मतदारसंघात मतदारांनी मोठ्या प्रमाणात मतदान केले होते. याच पार्श्वभूमीवर मुंबई महापालिकेच्या निवडणुकीत तरुणांना अधिकाधिक संधी देऊन पक्षाकडून ही निवडणूक लढवली जाणार असल्याचे सांगण्यात आले.

काँग्रेस, मनसे, शिवसेना आदी पक्षाच्या महाविकास आघाडीसोबत गेल्यास पक्षाला किती मतदारसंघात फायदा होऊ शकतो यासाठीची चर्चाही आजच्या बैठकीत झाली. सुरुवातीला आघाडीत किमान ५० जागा पक्षाकडून मागितल्या जाणार आहेत. यासाठीच्या वाटाघाटी पुढील दोन दिवसांत पूर्ण होतील. कमीत कमी जागा लढवून त्या अधिकाधिक जिंकून आणण्याची तयारी केली जाणार असल्याचे पक्षाकडून सांगण्यात आले.