२१ जिल्ह्यांमध्ये सिकलसेल तपासणी

२१ जिल्ह्यांमध्ये
सिकलसेल तपासणी
सकाळ वृत्तसेवा
मुंबई, ता. १८ :  सार्वजनिक आरोग्य विभागाच्या वतीने १५ जानेवारी ते ३१ जानेवारी २०२६ या कालावधीत राज्यात २१ जिल्ह्यांत ‘सिकलसेल तपासणी विशेष पंधरवडा’ राबविण्यात येणार आहे. १८ डिसेंबर ते १५ जानेवारी या कालावधीत अभियानाची पूर्वतयारी करण्यात येणार आहे, अशी माहिती सार्वजनिक आरोग्य व कुटुंबकल्याणमंत्री प्रकाश आबिटकर यांनी दिली.
आरोग्यमंत्र्यांच्या दालनात झालेल्या बैठकीत आरोग्य विभागाचे सचिव ई. रवींद्रन, आरोग्य आयुक्त डॉ. कादंबरी बलकवडे, आरोग्य संचालक डॉ. विजय कंदेवाड, सहसंचालिका डॉ. सुनीता गोल्हाईत यांच्यासह वरिष्ठ अधिकारी उपस्थित होते. या वेळी वैद्यकीय अधिकारी व कर्मचाऱ्यांचे पगार दरमहा १ ते ५ तारखेपर्यंत अदा करण्याच्या सूचना आबिटकर यांनी दिल्या. त्यात दिरंगाई झाल्यास संबंधित अधिकाऱ्याला जबाबदार धरले जाईल, असेही त्यांनी बजावले.