अवयवदानातून मिळाले पाच जणांना जीवदान

अवयवदानातून मिळाले पाच जणांना जीवदान
मुंबई, ता. १८ ः गेल्या दोन दिवसांत सलग दोन अवयवदानांमुळे एकूण पाच गरजू रुग्णांना नवसंजीवनी मिळाली आहे. त्‍यामुळे यावर्षी मुंबईत झालेल्या अवयवदानांची संख्या ५१ वर पोहोचली आहे.
झोनल ट्रान्सप्लांट को-ऑर्डिनेशनकमिटीकडून मिळालेल्या माहितीनुसार, पश्चिम उपनगरातील ५८ वर्षीय महिलेची प्रकृती गंभीर झाल्यानंतर तिला नमाह हेल्थकेअर रुग्णालयात दाखल करण्यात आले होते. तिची प्रकृती अधिक बिघडल्याने डॉक्टरांनी तिला ब्रेनडेड घोषित केले. त्यानंतर रुग्णालय प्रशासनाने कुटुंबीयांना अवयवदानाबाबत माहिती दिली असता कुटुंबीयांनी मोठ्या मनाने अवयवदानास संमती दिली.
या महिलेच्या दोन्ही मूत्रपिंडांच्या यशस्वीपणे प्रत्यारोपणासाठी अन्य रुग्णालयांत पाठविण्यात आले असून, त्यामुळे दोन गरजू रुग्णांना नवीन जीवनाची संधी मिळाली आहे. तसेच टिश्यू डोनेशनअंतर्गत कॉर्निया (डोळे) दान करण्यात आल्याने अंध व्यक्तींना दृष्टी मिळण्याची आशा निर्माण झाली आहे.
मुंबईतील ५० वे अवयवदान मंगळवारी मुलुंड येथील फोर्टिस रुग्णालयात पार पडले. येथील ७६ वर्षीय हरकचंद सांगोई यांचे यकृत व दोन्ही मूत्रपिंड यशस्वीपणे दान करण्यात आले.