भोंदूबाबाचा गृहिणीला १० लाखांचा गंडा

भोंदूबाबाचा गृहिणीला
१० लाखांचा गंडा

मुंबई, ता. १९ : आसामच्या कामाख्या देवी मंदिरात भेटलेल्या भोंदूबाबाने विलेपार्ले येथील गृहिणीला १० लाखांचा गंडा घातला. याप्रकरणी रामचंद्र सुतार नाव सांगणाऱ्या भोंदूबाबाविरोधात विलेपार्ले पोलिसांनी गुन्हा दाखल केला आहे.

तक्रारदार महिला जूनमध्ये गुवाहाटी येथील कामाख्या देवीच्या दर्शनासाठी गेली होती; मात्र मंदिरात भाविकांची प्रचंड गर्दी असल्याने दर्शनाशिवाय परतावे लागणार हाेते. तेव्हा रामचंद्रने त्यांना देवीचे दर्शन घडवले. दर्शनानंतर त्याने या महिलेस काही अडचण आहे का, असे विचारून तिच्या वैयक्तिक आयुष्याबाबत अंदाज बांधण्यास सुरुवात केली. त्यातील बऱ्याच घटना, प्रसंग प्रत्यक्षात घडल्याने या महिलेचा सुतारवर विश्वास बसला. त्याने अडचणी दूर करण्यासाठी मंत्रजप, अन्य कर्मकांड, धार्मिक विधी करावे लागतील, असे सांगितले. त्यानंतर ऑक्टोबरमध्ये ताे या महिलेच्या घरी आला. धार्मिक विधीसाठी त्याने दागिने मागितले. त्याने ते एका डब्यात ठेवून आपल्या सूचनेशिवाय ताे डबा उघडू नये, अन्यथा मुलाच्या जीवाला धोका होईल, अशी ताकीद दिली. त्यानंतर दोन वेळा त्याने घरी येऊन विधी केले. तक्रारदार महिलेच्या घरी लग्नकार्य असल्याने तिने डबा उघडताच त्यात बनावट दागिने आढळले. फसवणूक झाल्याचे लक्षात येताच तिने पाेलिसांत तक्रार दिली. त्यावरून १७ डिसेंबरला गुन्हा दाखल करण्यात आला.