८२ वर्षांच्या वृद्धेची पाच लाखांची फसवणूक

८२ वर्षांच्या वृद्धेची
पाच लाखांची फसवणूक

मुंबई, ता. १९ : मुलुंड येथे एकाकी राहणाऱ्या ८२ वर्षीय वृद्धेस आभासी अटकेची भीती घालून सायबर भामट्यांनी पाच लाख रुपयांना फसवले. याप्रकरणी नवघर पोलिसांनी अज्ञात आरोपींविरोधात गुन्हा नोंदवून तपास सुरू केला आहे.

तक्रारदार वृद्धा मुलुंड पूर्वेकडील हरिओमनगरात राहतात. हॅण्डलूम एक्स्पोर्ट कॉर्पोरेशनमधून त्या सहाय्यक व्यवस्थापक म्हणून निवृत्त आहेत. त्यांचा मुलगा व्यवसायानिमित्त दुबई येथे स्थायिक आहे. सोमवारी (ता. १५) त्यांना भामट्यांनी ईडी अधिकारी म्हणून संपर्क साधला. त्यांच्या नावे असलेल्या बँक खात्यातून दोन कोटी रुपयांचे संशयास्पद व्यवहार झाले असून ही रक्कम दहशतवाद्यांना पुरवली. तसेच राष्ट्रीय तपास यंत्रणेला (एनआयए) एका अतिरेक्याच्या घरातून वृद्धेच्या नावावरील २५० क्रेडिट कार्ड सापडली आहेत, अशी भीती घालण्यात आली.

याप्रकरणी अटक टाळण्यासाठी बँकेत जमा रक्कम तपासकामी पाठवावी लागेल. संशय दूर होताच ती रक्कम परत करावी लागेल, असे सांगत भामट्यांनी वृद्धेला तिच्या खात्यावरील पाच लाखांची जमा अन्य खात्यावर वळवण्यास सांगितली. ही रक्कम वळती होताच वृद्धेच्या मुलास या व्यवहाराबाबत अलर्ट मिळाला. फसवणूक झाल्याचे कळताच त्याने आईस तक्रार करण्यास सांगितले.