बांगलादेशातील हत्याकांडाविरोधात आंदोलन

बांगलादेशातील हत्याकांडाविरोधात आंदोलन

सकाळ वृत्तसेवा
​मुंबई, ता. २३ : बांगलादेशात हिंदू युवकाच्या निर्घृण हत्येचे पडसाद आता संपूर्ण भारतभर उमटू लागले आहेत. या घटनेच्या निषेधार्थ मुंबईत हिंदुत्ववादी संघटनांनी आक्रमक पवित्रा घेत छत्रपती शिवाजी महाराज टर्मिनस परिसरात मंगळवारी (ता. २३) आंदोलन केले. बांगलादेश दूतावासावर धडक देण्याच्या प्रयत्नात असलेल्या आंदोलकांनी रस्ता रोखून धरल्याने परिसरात काही काळ तणावाचे वातावरण निर्माण झाले होते.

आंदोलकांनी बांगलादेश दूतावासाच्या दिशेने कूच करण्याचा प्रयत्न केला, ज्यामुळे पोलिसांनी तातडीने बंदोबस्त वाढवला. देशातील विविध भागांत बांगलादेश सरकारच्या प्रतीकात्मक पुतळ्यांचे दहन करून संताप व्यक्त केला जात आहे. विविध हिंदू संघटनांनी पंतप्रधान नरेंद्र मोदी आणि राष्ट्रपती द्रौपदी मुर्मू यांना या प्रकरणात तातडीने हस्तक्षेप करून बांगलादेश सरकारवर दबाव आणण्याची मागणी केली आहे. या वेळी आंदोलकांनी रस्त्यावर ठिय्या मांडल्यामुळे दक्षिण मुंबईतील वाहतूक व्यवस्थेवर मोठा परिणाम झाला. वाहनांच्या लांबच लांब रांगा लागल्याने प्रवाशांचे हाल झाले. परिस्थिती हाताबाहेर जाऊ नये, म्हणून पोलिसांनी वेळीच हस्तक्षेप करत अनेक आंदोलकांना ताब्यात घेतले. पोलिसांच्या कारवाईनंतर रस्ता मोकळा करण्यात आला. ​काही आंदोलकांना पोलिसांनी ताब्यातही घेतले. ‘बांगलादेशात हिंदू समाज सुरक्षित नाही, ही चिंतेची बाब आहे. भारत सरकारने यावर कठोर पावले उचलली पाहिजेत,’ अशी भावना आंदोलक कार्यकर्त्यांनी व्यक्त केली.