जुहू अपघात प्रकरणी मर्सिडीज चालकाविरोधात गुन्हा

जुहू अपघातप्रकरणी मर्सिडीज चालकाविरोधात गुन्हा

मुंबई, ता. २० : अभिनेता अक्षय कुमार याच्या ताफ्यातील वाहनाच्या अपघातप्रकरणी जुहू पोलिसांनी मर्सिडीज कारचालक राधेश्याम जितेंद्र राय (५५) विरोधात गुन्हा नोंदवला. या अपघाताचा अक्षयच्या ताफ्यातील वाहनाशी संबंध नसल्याचे जुहू पोलिसांनी मंगळवारी स्पष्ट केले.
पोलिसांनी दिलेल्या माहितीनुसार, सोमवारी रात्री ९ च्या सुमारास जुहू येथील सिल्व्हर बीच कॅफेसमोर वाहतूक कोंडीत खोळंबून पडलेल्या रिक्षाला मागून भरधाव आलेल्या मर्सिडीजने जोरदार धडक दिली. या धडकेमुळे रिक्षा पुढे उभ्या असलेल्या इनोव्हा कारवर आदळली. बेचक्यात फसल्याने रिक्षाचा चेंदामेंदा झाला. त्यामुळे रिक्षाचालक बासित खान गंभीर जखमी झाले. त्यांना नजीकच्या रुग्णालयात दाखल करण्यात आले आहे, तर रिक्षातून प्रवास करणारे अमन भारद्वाज किरकोळ जखमी झाले. इनोव्हा कार अक्षय यांच्या ताफ्यातील होती, असे पोलिसांनी स्पष्ट केले. अपघातास जबाबदार धरत पोलिसांनी मर्सिडीजचालक राय यांच्याविरोधात भारतीय न्याय संहितेतील कलम २८१, १२५(अ) आणि १२५(ब) अन्वये गुन्हा दाखल करण्यात आला. वैद्यकीय चाचणीनंतर नोटीस देत त्यांना सोडण्यात आले.