शैक्षणिक वस्तू खरेदीत महापालिकेची कोंडी

शैक्षणिक वस्तू खरेदीत महापालिकेची कोंडी
निविदांना प्रतिसाद कमी; काही वस्तूंसाठी तिसऱ्यांदा फेर-निविदा
सकाळ वृत्तसेवा
​मुंबई, ता. १३ : महापालिकेच्या शाळा येत्या जून महिन्यात सुरू होण्यापूर्वीच विद्यार्थ्यांना शैक्षणिक वस्तूंचे वाटप करण्याचे उद्दिष्ट प्रशासनाने ठेवले होते. मात्र, या वस्तू खरेदीच्या निविदा प्रक्रियेला पुरवठादारांकडून थंड प्रतिसाद मिळत असल्याने महापालिकेची डोकेदुखी वाढली आहे. तांत्रिक कारणांमुळे आणि पुरेसे निविदाकार न आल्याने काही वस्तूंच्या खरेदीसाठी आता तिसऱ्यांदा फेर-निविदा काढण्याची वेळ प्रशासनावर आली आहे.
​महापालिका शिक्षण विभागामार्फत दरवर्षी विद्यार्थ्यांना गणवेश, वह्या, बूट, मोजे, छत्री आणि रेनकोट यांसारख्या वस्तूंचे मोफत वाटप केले जाते. या प्रक्रियेत विलंब होऊ नये, यासाठी यंदा मध्यवर्ती खरेदी विभागाने फेब्रुवारी महिन्यापासूनच निविदा प्रक्रिया सुरू केली होती. मात्र, गणवेश आणि रेनकोट यांसारख्या महत्त्वाच्या वस्तूंच्या खरेदीसाठी आवश्यक तितके निविदाकार पुढे आलेले नाहीत. नियमानुसार किमान तीन निविदा येणे आवश्यक असताना, काही प्रकरणांत केवळ दोनच निविदा प्राप्त झाल्याने तांत्रिक पेच निर्माण झाला आहे.
​यासंदर्भात माहिती देताना शिक्षण विभागाच्या अध्यक्ष राजेश्री शिरवडकर यांनी सांगितले की, काही वस्तूंसाठी निविदाकारांनी प्रतिसाद दिला आहे, तर काही ठिकाणी फक्त दोनच निविदाकार आले आहेत. या तांत्रिक कारणांमुळे प्रक्रिया पुन्हा राबवावी लागत आहे. काही निविदेला तीनऐवजी दोनच निविदाकार आल्याने फेर-निविदा मागवण्यात आल्या आहेत. यात वेळ जात असला तरी विद्यार्थ्यांवर अन्याय होणार नाही, याची आम्ही काळजी घेत आहोत.
शाळा सुरू होण्यापूर्वी विद्यार्थ्यांना सर्व उपयोगी वस्तू मिळाव्यात, यासाठी प्रशासन कटिबद्ध आहे आणि लवकरच यावर योग्य निर्णय घेतला जाईल, असा विश्वास त्यांनी व्यक्त केला.

अन्य कायदेशीर पर्यायांचा विचार
​महापालिकेने वह्यांसाठी सुमारे २६.४२ कोटी, तर छत्र्यांसाठी ३.५१ कोटी रुपयांच्या निविदा प्रसिद्ध केल्या आहेत. याशिवाय गणवेश आणि बूट-मोज्यांसाठीही मोठी तरतूद करण्यात आली आहे. वारंवार निविदा काढूनही प्रतिसाद मिळाला नाही, तर महापालिका प्रशासन थेट खरेदी किंवा अन्य कायदेशीर पर्यायांचा विचार करण्याची शक्यता आहे.