विचित्र अपघातात पादचाऱ्याचा मृत्यू

विचित्र अपघातात पादचाऱ्याचा मृत्यू
रिंग निखळून लागल्याने दुर्घटना
मुंबई, ता. ४ ः नादुरुस्त वाहन उचलून नेणाऱ्या भरधाव टोइंग व्हॅनच्या चाकातील लोखंडी रिंग निखळून ती रस्त्यावरून जाणाऱ्या पादचाऱ्याला लागली. रफी अहमद किडवई मार्गावरील नॅशनल मार्केटसमोर रविवारी दुपारी तीनच्या सुमारास घडलेल्या या विचित्र अपघातात जखमी पादचाऱ्याचा मृत्यू झाला. याप्रकरणी आरएके पोलिसांनी टोइंग व्हॅनचालक मोहम्मद फारुख शेखविरोधात गुन्हा नोंदवला आहे. पोलिसांनी दिलेल्या माहितीनुसार, शेख नादुरुस्त कार टोइंग व्हॅनद्वारे गॅरेजमध्ये नेत होता; मात्र व्हॅनची नियमित-देखभाल केली नसल्याने वेग घेताच मागील चाकातील लोखंडी रिंग निखळली. ही रिंग उडून रस्त्यावरून पायी जाणाऱ्या शैलू मारुती या तरुणाच्या मानेजवळ लागली. त्याला रुग्णालयात नेण्यात आले, मात्र उपचारापूर्वीच त्याचा मृत्यू झाला.