एसी लोकलमध्ये टीसींशी हुज्जत

एसी लोकलमध्ये टीसींशी हुज्जत
प्रवाशांवर दंडात्मक कारवाई

सकाळ वृत्तसेवा
मुंबई, ता. ७ : पश्चिम रेल्वेच्या विरार-चर्चगेट जलद एसी लोकलमध्ये सामान्य लोकलचे तिकीट काढून प्रवास करणाऱ्या सहा प्रवाशांविरोधात तिकीट तपासणी पथकाने कारवाई केली. दंड भरण्यास नकार देत संबंधित प्रवाशांनी तिकीट तपासनीसांशी हुज्जत घालत गैरवर्तन केल्याची घटना बुधवारी संध्याकाळी घडली. या घटनेचा व्हिडिओ व्हायरल झाला आहे.
पश्चिम रेल्वेने दिलेल्या माहितीनुसार, विरारहून सायंकाळी ७.५१ वाजता सुटलेल्या चर्चगेट जलद एसी लोकलमध्ये तिकीट तपासणी सुरू असताना अंधेरी ते वांद्रे यादरम्यान सहा प्रवासी सामान्य लोकलचे तिकीट घेऊन एसी लोकलमध्ये प्रवास करताना आढळले. तिकीट तपासनीसांनी त्यांच्याकडे दंड भरण्याची मागणी केली असता संबंधित प्रवाशांनी टाळाटाळ करण्यास सुरुवात केली. तसेच तिकीट तपासणी कर्मचाऱ्यांसोबत वाद घालत गोंधळ निर्माण केला. यानंतर संबंधित प्रवाशांना दादर स्थानकाच्या प्लॅटफॉर्म क्रमांक पाचवर उतरविण्यात आले; मात्र तेथेही त्यांनी तिकीट तपासनीसांसोबत वाद सुरूच ठेवला. अखेर रेल्वे सुरक्षा बलाच्या (आरपीएफ) जवानांना घटनास्थळी बोलाविण्यात आले. त्यांच्या हस्तक्षेपानंतर परिस्थिती नियंत्रणात आली.
...
दंड वसूल
या कारवाईत तिकीट तपासनीस शुभम पाटीदार, दीपक सिंह आणि विष्णू ठाकूर यांनी प्रवाशांकडून एकूण २,१६० रुपयांचा दंड वसूल केल्याची माहिती पश्चिम रेल्वेने दिली.