दारूच्या नशेत पोलिस वाहनालाच धडकला

दारूच्या नशेत पोलिस वाहनालाच धडकला
दुचाकीचालकास अटक
मुंबई, ता. २३ ः दारूच्या नशेत भरधाव दुचाकी चालवून गस्तीवरील पोलिस वाहनाला धडकणाऱ्या तरुणाला दादर पोलिसांनी अटक केली. हा अपघात सोमवारी पहाटे दादरच्या खेड गल्लीत घडला. सुनील धर्मा (२८) असे आरोपी तरुणाचे नाव असून, तो घाटकोपरच्या कामराज नगरचा रहिवासी आहे.
पोलिसांनी दिलेल्या माहितीनुसार, दादर पोलिस ठाण्यात नियुक्त अंमलदार शिवाजी झिने आणि त्यांचे सहकारी रविवारी रात्री गस्त घालत होते. पहाटे ही पथक खेड गल्ली परिसरातून दादर पोलिस ठाण्याकडे येत असताना समोरून भरवेगात येणारी बुलेट पोलिस वाहनाला धडकली. पोलिसांनी लागलीच दुचाकीचालकाला ताब्यात घेतले. तो दारूच्या नशेत असल्याचा संशय आल्याने पोलिसांनी त्यास वैद्यकीय चाचणीसाठी रुग्णालयात नेले. चाचणीत ते दारूच्या नशेत असल्याचे स्पष्ट झाले. त्यानुसार दारूच्या नशेत वाहन चालवणे, शासकीय वाहनाचे नुकसान करणे या गुन्ह्यात सुनील यास अटक करण्यात आल्याचे पोलिसांनी सांगितले.