जनजागृतीमुळे व्यसनाधिनता कमी होईल

मुरूड, ता. ११ (बातमीदार) : अमली पदार्थांच्या विळख्यात अडकलेली पिढी व्यसनाच्या गर्तेतून बाहेर यावी, यासाठी जनजागृती होणे आवश्यक आहे. अशा जनजागृतीमुळेच व्यसनाधिनता कमी होवून समाज व्यसनमुक्त घडेल, असा विश्वास मुरूड पोलिस उपनिरीक्षक नितिन मंडलिक यांनी व्यक्त केला.
रायगड जिल्हा पोलिस अधीक्षक सोमनाथ घार्गे यांच्या मार्गदर्शनाखाली मुरूड पोलिस ठाणे अंतर्गत नशामुक्त भारत रॅली कार्यक्रमावेळी आपले विचार व्यक्त करत होते. या वेळी नशा करू नका! नशेत गाडी चालू नका! आपले जीव लाख मोलाचे, कुटुंबाला सांभाळा! या संदर्भातले पत्रके व स्टिकर रिक्षाचालकांना आणि नागरिकांना वाटप करण्यात आले. रिक्षाचालकांनी स्टीकर लावून जनजागृती फेरी काढली. या वेळी पोलिस उपनिरीक्षक नितीन मंडलिक, पोलिस नाईक परेश म्हात्रे, पोलिस नाईक सुरेश वाघमारे, पोलिस शिपाई सागर रसाळ, रिक्षा चालक-मालक संघटनाचे अध्यक्ष मुज्जफर सुर्वे, वाहतूक पोलिस हवालदार संतोष गायकवाड, माजी अध्यक्ष रिक्षाचालक-मालक संघटना अस्लम शेख, सारिक सुर्वे, मुकेश दांडेकर, इम्रान काजी आदींसह होमगार्ड व पोलिस कर्मचारी उपस्थित होते.