शिक्षक क्रीडा स्पर्धेत म्हसळा केंद्राचे वर्चस्व

शिक्षक क्रीडा स्पर्धेत म्हसळा केंद्राचे वर्चस्व
म्हसळा, ता. ११ (बातमीदार) ः राज्य शासनाच्या राष्ट्रीय शिक्षण धोरण २०२० आणि राज्य अभ्यासक्रम आराखडा २०२४ नुसार शिक्षक, अधिकारी आणि शिक्षण विभागातील कर्मचाऱ्यांचा सर्वांगीण विकास साधण्यासाठी राज्यभर विविध उपक्रम आणि क्रीडा स्पर्धांचे आयोजन करण्यात येत आहे. या उपक्रमाचा एक भाग म्हणून तालुका स्तरावरील शिक्षक क्रीडा स्पर्धा न्यू इंग्लिश स्कूल, म्हसळा येथे उत्साहपूर्ण वातावरणात पार पडल्या.
या स्पर्धांचे उद्दिष्ट शिक्षकांमध्ये समन्वय, सहकार्य, संघभावना आणि खेळाडूवृत्ती जोपासणे हे होते. स्पर्धांमध्ये व्हॉलीबॉल, खो-खो, गोळाफेक, थाळीफेक, भालाफेक आणि १०० मीटर धावणे यांसारख्या खेळांचा समावेश होता. तालुक्यातील विविध केंद्रांतील शिक्षकांनी या स्पर्धांमध्ये मोठ्या उत्साहाने सहभाग घेतला. सांघिक स्पर्धांमध्ये म्हसळा केंद्राने वर्चस्व गाजवले. संपूर्ण स्पर्धा अत्यंत शिस्तबद्ध आणि उत्साहपूर्ण वातावरणात पार पडल्या. शिक्षकवर्गाचा उत्स्फूर्त सहभाग आणि खेळाडूवृत्ती या स्पर्धांचे वैशिष्ट्य ठरले. विजेत्या खेळाडूंना पारितोषिक वितरण समारंभात गौरविण्यात आले.
या यशस्वी आयोजनाबद्दल आयोजक समिती, मुख्याध्यापक आणि सर्व शिक्षक-कर्मचारी यांचे सर्वत्र कौतुक होत आहे. या स्पर्धांमुळे शिक्षकांमध्ये आरोग्यदायी स्पर्धात्मकता वाढीस लागून, शिक्षण क्षेत्रातील सहकार्याची भावना अधिक दृढ झाली असल्याचे निरीक्षण व्यक्त करण्यात आले.