महापालिकेचा अनधिकृत बांधकामावर हातोडा

विरार, ता. ९ (बातमीदार) : वसई-विरार महापालिका हद्दीत मोठ्या प्रमाणावर होणाऱ्या अनधिकृत बांधकामांवर कारवाई करण्यास महापालिकेने सुरुवात केली आहे. आयुक्त अनिलकुमार पवार यांच्या आदेशाने उपायुक्त अजित मुठे (अतिक्रमण विभाग) यांच्या मार्गदर्शनाखाली प्रभाग समिती ‘जी’ वालीवअंतर्गत अनधिकृत बांधकामावर गुरुवारी हातोडा मारण्यात आला.
पालिकेच्या प्रभाग समिती ‘जी’ वालीव अंतर्गत चिंचोटी येथील सर्वे नं. ७५ व २८ येथे २५ खोल्यांचे एकूण ७५०० चौ. फुटाचे व ५२ प्लिंथ १५,६०० चौ. फुटाचे अनधिकृत बांधकाम पाडण्यात आले. तसेच राजावली येथील भोयदापाडा रोड सर्वे नं. ३२ येथे २ रूम ६०० चौ. फूट व ३० प्लिंथ ९००० चौ. फुटाचे अनधिकृत बांधकामावरही कारवाई करण्यात आली. या कारवाई वेळी प्रभाग सहा. आयुक्त धनश्री शिंदे, कनिष्ठ अभियंता कल्पेश कडव, गौरव परिहार, लिपिक सुनील तेलगोटे, तसेच ससुनवघर तलाठी अधिकारी, प्रभाग समिती कर्मचारी, मजूर उपस्थित होते. या मोहिमेत एकूण ३२,७०० चौ. फुटाचे बांधकामी तोडण्यात आले.