के. व्ही. हायस्कूलमध्ये पारितोषिक वितरण समारंभ

जव्हार, ता. ९ (बातमीदार) : जव्हार येथील के. व्ही. हायस्कूल शाळेचा वार्षिक पारितोषिक वितरण समारंभाला शाळेचे माजी विद्यार्थी कॅप्टन विनीत मुकणे यांची प्रमुख उपस्थिती लाभली. के. व्ही. हायस्कूल व आर. वाय. जुनियर कॉलेजच्या ४६८ विद्यार्थ्यांनी क्रीडा स्पर्धेत सहभाग घेतला. पैकी १५६ विद्यार्थ्यांनी प्रथम पारितोषिक मिळवले, १५६ विद्यार्थ्यांना द्वितीय; तर १५६ विद्यार्थ्यांनी तृतीय पारितोषिक मिळवले. तसेच सांस्कृतिक कार्यक्रमांमध्ये १५५ विद्यार्थ्यांनी सहभाग घेतला. यापैकी ४७ विद्यार्थ्यांनी प्रथम, ५२ विद्यार्थ्यांनी द्वितीय; तर ५६ विद्यार्थ्यांनी तृतीय क्रमांक मिळवले. या सर्व विजेत्या विद्यार्थ्यांना उद्योजक कॅप्टन विनीत मुकणे यांच्याहस्ते पारितोषिके देण्यात आली. कार्यक्रमाच्या अध्यक्षस्थानी कला वाणिज्य व विज्ञान महाविद्यालयाचे प्राचार्य तथा जव्हार केंद्राचे ब्रँच सेक्रेटरी डॉ. एम. आर. मेश्राम होते. प्रास्ताविक किशोर सावकारे यांनी केले. अहवाल वाचन प्राचार्य दिलीप उदमले यांनी; तर पर्यवेक्षक सुरेश वाल्हे यांनी आभार मानले. कार्यक्रमाचे सूत्रसंचलन वैभव खंडागळे व शीतल अहिरे यांनी केले.