कल्याण ग्रामीण परिसरात कुस्तीची दंगल

सकाळ वृत्तसेवा
डोंबिवली, ता. १९ : कल्याण ग्रामीण विधानसभा क्षेत्रातील उत्तरशिव-गोठेघर येथील मैदानात कुस्त्यांचे जंगी सामने भरवण्यात आले होते. हे सामने पाहण्यासाठी गावकऱ्यांनी गर्दी केली होती. या कुस्तीच्या सामन्यात लहान मुले-मुली तसेच मोठ्या मल्लांनी भाग घेतला होता. कुस्तीचे आयोजन जिल्हा परिषद सदस्य रमेश पाटील यांनी केले होते. हे सामने पाहण्यासाठी माजी आमदार सुभाष भोईर यांनी आवर्जून उपस्थिती लावली होती.
जिल्हा परिषद सदस्य रमेश पाटील यांनी सांगितले, की गेली २३ वर्षे या मैदानात आम्ही क्रिकेट सामने भरवत होतो; मात्र या वेळी कुस्तीचे सामने भरवले आहेत. या मातीमधील खेळाडूंना प्रोत्‍साहन देण्यासाठी आम्ही या सामन्‍यांचे आयोजन केले होते. भिवंडी, कल्याण, कल्याण ग्रामीण, डोंबिवली, मलंगगड, अंबरनाथ, कर्जत, पनवेल या परिसरातून ४०० मल्लांनी यात भाग घेतला.