प्रतिकार करणाऱ्यावर लुटारूंचा हल्ला

नवी मुंबई (वार्ताहर) : दोन लाख रुपयांची रोख रक्कम असलेली बॅग लुटण्यासाठी आलेल्या दोघा लुटारूंना प्रतिकार करणाऱ्या तरुणावर दोघा लुटारूंनी धारदार हत्याराने हल्ला केल्याची घटना सानपाडा सेक्टर-८ मध्ये घडली. या हल्ल्यात तरुण गंभीर जखमी झाला असून त्याच्यावर रुग्णालयात उपचार सुरु आहेत.
नेरूळ येथे राहणारा अनिल जयस्वाल (३२) हा एपीएमसी मार्केटमध्ये मनी ट्रान्सफरचे काम करणाऱ्या राजकुमार जयस्वालकडे काम करत होता. मनी ट्रान्सफरद्वारे जमा झालेली रोख रक्कम दरदिवशी मालक राजकुमार याच्या नेरूळ येथील घरी नेऊन देत होता. शनिवारी (ता. ८) रात्रीदेखील जमा झालेली दोन लाखांची रोख रक्कम घेऊन अनिल रात्री सव्वाअकराच्या सुमारास मोटरसायकलवरून नेरूळ येथे निघाला होता. या वेळी सानपाडा सेक्टर- ६ मध्ये आला असताना दोघा लुटारूंनी त्याच्याजवळ असलेली रोख रकमेची बॅग खेचण्याचा प्रयत्न केला; मात्र अनिलने त्यांना प्रतिकार केल्याने एका लुटारूने धारदार हत्याराने अनिलवर वार केला होता.