कोंडीतून मार्ग काढताना दुचाकीस्वारांची कसरत

सकाळ वृत्तसेवा

डोंबिवली, ता. १ : कल्याण-शिळ रोडवरील वाहतूक कोंडी ही वाहनचालकांची रोजची डोकेदुखी झाली आहे. या कोंडीतून मार्ग काढण्यासाठी दुचाकीस्वार मिळेल त्या चिंचोळ्या मार्गातून आपली दुचाकी काढताना दिसतात. आता तर या दुचाकीस्वारांनी हद्दच केली आहे. चक्क पाण्याच्या पाईपलाईनमधून चालकांनी मार्ग काढत कोंडी फोडण्याचा प्रयत्न केला आहे. देसाई गावाजवळील हा व्हिडीओ समाज माध्यमावर प्रचंड प्रमाणात व्हायरल होत आहे.
कल्याण-शिळ रोडचे सिमेंट काँक्रिटीकरणाचे काम सुरू आहे. ठिकठिकाणी सुरू असलेल्या या कामामुळे या मार्गावर सकाळ-संध्याकाळ प्रचंड प्रमाणात वाहतूक कोंडी होते. वाहनांची वाढलेली संख्या, कल्याण-शिळ रोडचे काही ठिकाणी रखडलेले रुंदीकरण, रस्त्याची सुरू असलेली कामे आदी अनेक कारणे या कोंडीस कारणीभूत आहेत. देसाई गाव, काटई नाका, पलावा जंक्शन अशी कोंडीची अनेक ठिकाणे आहेत. चारचाकी वाहनांच्या रांगा इथे लागत असल्याने दुचाकीस्वार रस्त्याच्या कडेने, विरुद्ध दिशेने, कच्चा रस्ता तसेच मिळेल त्या अरुंद मोकळ्या जागेतून मार्ग काढताना दिसतात. या दुचाकीस्वारांमुळे अनेकदा कोंडीत भर पडते.
.....
बेशिस्तपणामुळे कोंडीत भर
दुचाकीस्वार कोंडीतून कसे वाहन काढतील याचा काही एक नेम नसताना आता एक नवा मार्ग दुचाकीस्वारांनी देसाई गावाजवळ शोधून काढला आहे. चक्क पाईपलाईनमधून मार्ग काढून तेही विरुद्ध दिशेने वाहन चालवत मार्गस्थ होत आहेत. आधीच वाहतूक कोंडी होत असताना विरुद्ध दिशेने बेशिस्तपणे गाडी चालवणाऱ्या वाहनचालकांमुळे या वाहतूक कोंडीत भर पडत असल्याने इतर वाहनचालक त्रस्त झाले आहेत.