पर्यटक परतीच्या वाटेवर

पर्यटक परतीच्या वाटेवर
महामार्गावरील कोंडी टाळण्यासाठी सागरी मार्गाचा पर्याय

अलिबाग, ता. १ (बातमीदार) ः तीन दिवसांच्या सलग सुटीनंतर मुंबई-पुण्याकडील पर्यटक सोमवारी परतीच्या प्रवासाला निघाले. काही खासगी वाहनाने, काही सरकारी वाहनाने तर काहींनी जलप्रवासाचा मार्ग अवलंबला. महामार्गावरील वाहतूक कोंडी टाळण्यासाठी अनेकांनी सागरी मार्गाने जाण्याचा पर्याय स्‍वीकारल्‍याने पीएनपी, अंजठा जेटीवर गर्दी झाली होती.
सुटीचा आनंद घेण्यासाठी पर्यटकांनी रायगड जिल्ह्याला पसंती दर्शविली. उन्हाचे चटके जाणवत असल्याने पर्यटकांची समुद्र किनारी गर्दी दिसून आली. अलिबाग, नागाव, वरसोली, किहीम, रेवदंडा, आक्षी, मुरूड, काशीद हे समुद्रकिनारे पर्यटकांनी फुलून गेले होते. समुद्रात पोहण्याबरोबरच स्‍पीडबोट, बनाना बोटीची सफर, घोडागाडी, उंट सवारीचा आनंद पर्यटकांनी घेतला. पर्यटकांच्या गर्दीमुळे हॉटेल, कॉटेजमध्ये हाऊसफुल होते. त्‍यामुळे स्‍थानिकांनाही चांगला रोजगार मिळाला. दोन दिवसांच्या सहलीनंतर सोमवारी दुपारनंतर पर्यटकांनी परतीचा प्रवास सुरू केला.

महामार्गावर पोलिस तैनात
महामार्गावर वाहतूक कोंडी होत असल्‍याने अनेकांनी मुंबई गाठण्यासाठी सागरी प्रवासाला पसंती दर्शवली. पर्यटकांचा प्रवास सुखकर व्हावा तसेच त्यांना निश्चितस्थळी विना व्यत्‍यय वेळेवर पोहचता यावे, यासाठी वाहतूक पोलिसांचा सकाळपासून बंदोबस्त ठेवला होता. मुरूडपासून खारपाडापर्यंत अनेक ठिकाणी वाहतूक पोलिस तैनात होते.

सलग तीन दिवसाच्या सुटीनंतर परत जाणाऱ्या पर्यटकांना निश्चित स्थळी पोहचता यावे यासाठी अलिबाग आगाराने पनवेलपर्यंत विनाथांबा बस सेवेवर भर दिला. प्रत्येक १० ते१५ मिनिटाने विनाथांबा सेवा सुरू केली. पर्यटकांची गैरसोय होऊ नये, यासाठी जादा बसचीही व्यवस्था केली होती.
अजय वनारसे, आगार व्यवस्थापक, अलिबाग