डिझेल चोरीप्रकरणी एकाला अटक

नवी मुंबई (वार्ताहर) : रस्त्याच्या बाजूला उभ्या असलेल्या वाहनांतील डिझेलची चोरी करणाऱ्या त्रिकुटापैकी एकाला खारघर पोलिसांनी अटक केली आहे. सिराज पटेल असे या चोरट्याचे नाव असून त्याचे दोन साथीदार मात्र पळू गेले आहेत.
सायन-पनवेल मार्गावर गस्त घालत असताना खारघर पोलिस ठाण्यातील बीट मार्शल यांना पहाटे ५.३० च्या सुमारास खारघर टोलनाक्याच्या पुढे काही व्यक्ती संशयास्पद हालचाली करताना निदर्शनास आल्या होत्या. या वेळी पोलिसांना तीन जण रस्त्याच्या बाजूला उभ्या असलेल्या कंटनेरमधील डिझेल पाईपच्या साहाय्याने चोरत होते; पण त्यांना पोलिसांची चाहुल लागल्यामुळे तिघांनी खारघरमधील उत्सव चौकाच्या दिशेने पळ काढला होता. या वेळी पळून जाण्याच्या प्रयत्नात असताना पोलिसांनी सिराज पटेल याला पकडले; तर त्याचे साथीदार सलमान कल्दानी, फिरोज कल्दानी मात्र पळून जाण्यात यशस्वी झाले.