Thane: ठाण्यात ऑनलाईन सेक्स रॅकेटचा पर्दाफाश; गुन्हे शाखेच्या पथकाने दोघांना घेतले ताब्यात

ठाणे: वेश्याव्यसायासाठी समाजमाध्यमांचा वापर करून शरीरसुखाची मागणी करणाऱ्या ग्राहकांपर्यंत तरुणींचे फोटो पाठवून चालवण्यात येणाऱ्या सेक्स रॅकेटचा पर्दाफाश करण्यात आला आहे.

महिला दलाल बुलबुल बानो ऊर्फ बुलबुल हमीद खान (वय २४) आणि तिचा साथीदार रिक्षाचालक सुरेंद्र यादव (वय ३१) याला ठाणे गुन्हे शाखेच्या कक्षाने सापळा रचून अटक केली आहे. दलाल आणि रिक्षाचालकाच्या विरोधात भिवंडी येथील कोनगाव पोलिस ठाण्यात गुन्हा दाखल करण्यात आला आहे.

विविध लॉजिंग-बोर्डिंगमध्ये वेश्याव्यवसाय चालत असल्याची माहती ठाणे गुन्हे शाखेला मिळाली होती. त्यानुसार पोलिस पथकाने मंगळवारी (ता. ४) रात्रीच्या सुमारास मुंबई-नाशिक महामार्गावरील रांजणोली बायपास येथील सॉलिटियर रेसिडेन्सी या लॉजिंग बोर्डिंगमध्ये सापळा रचला होता.

त्या वेळी महिला दलाल बुलबुल बानो ही शरीरसुखाची मागणी करणाऱ्या ग्राहकांच्या व्हॉट्सॲप नंबरवर तरुणींचे फोटो पाठवून सौदा करत असताना आढळून आली. त्यानंतर गुन्हे पथकाने बुलबुल बानो आणि रिक्षाचालक सुरेंद्र यादव या दोघांना ताब्यात घेतले.

त्यांच्याकडील मोबाईलसह ७२ हजार ६० रुपये हस्तगत केले. शिवाय दलालाच्या तावडीतून दोन तरुणींची सुटका केली.