उल्हासनगरात गटारावरील स्लॅब कोसळले

उल्हासनगर, ता. ६ (वार्ताहर) : शहरातील एका गटारावरील स्लॅब कोसळल्याने त्या ठिकाणी भले मोठे भगदाड पडले आहे. त्यामुळे गटारात अनेक जण पडून दुर्घटना घडत आहेत. ॲड. चरण पेंथालिया यांचे कार्यालय हे कॅम्प नंबर ५ मधील कैलास कॉलनी स्मशानभूमीसमोर आहे. काही दिवसांपूर्वी त्यांच्या कार्यालयासमोरील स्लॅब कोसळल्याने तिथे भगदाड पडले. विशेष म्हणजे कार्यालयाचा दरवाजा हा पडलेल्या भगदाडासमोरच असल्याने ये-जा करण्यासाठी तोकड्या जागेचा आधार घ्यावा लागतो. पावसाळ्याच्या दिवसात घसरण होत असल्याने अनेकदा या तोकड्या जागेवरून जाताना वकील, क्लायंट पडत असून तक्रार केल्यावरही पालिकेकडून कार्यवाही होत नसल्याची माहिती पेंथालिया यांनी दिली. यासंदर्भात पालिकेचे शहर अभियंता संदीप जाधव, उपअभियंता तरुण सेवकानी यांच्याशी संपर्क साधला असता शुक्रवारी कर्मचाऱ्यांना पाठवून पडलेल्या स्लॅबची पाहणी करून लवकरात लवकर कामाची सुरुवात करण्यात येणार असे सांगितले.