लैगिंक अत्याचारानंतर अश्‍लील व्हिडीओ सोशल मिडीयावर व्हायरल

लैंगिक अत्याचार करून
व्हिडीओ केला व्हायरल

मालाडमधील खासगी क्लासेसच्या शिक्षकाला अटक

अंधेरी (बातमीदार) : एका १८ वर्षांच्या तरुणीवर लैंगिक अत्याचार करून त्‍याचा व्हिडीओ सोशल मीडियावर व्हायरल करणाऱ्या खासगी क्लासेसच्या शिक्षकाला पोलिसांनी अटक केली आहे. रुन्फस डेव्हीड तुपदल असे त्याचे नाव आहे. मालाडच्या मालवणी परिसरात हा धक्कादायक प्रकार उघडकीस आला आहे. पीडित तरुणीच्या तक्रारीवरून मालवणी पोलिसांनी त्याच्याविरोधात लैंगिक अत्याचारासह धमकी देणे आणि आयटी कलमांनुसार गुन्हा दाखल झाला आहे. या प्रकारामुळे संताप व्यक्त करण्यात येत आहे.

पीडित तरुणी ही मालाड परिसरात राहत असून नामांकित महाविद्यालयात शिकत आहे. ती मालाडच्या एका खासगी क्लासेसमध्ये जात होती. ११ जूनला ती क्लासमध्ये गेली असता तिला तुपदल याने ‘क्लासमध्ये जागा नसून तू माझ्यासोबत चल’ असे सांगून तिला मढ येथील त्याच्या घरी घेऊन आला. तेथे तिच्याशी लगट करून त्याने तिला प्रेम असल्याचे सांगितले आणि तिच्यावर लैंगिक अत्याचार केला. तसेच त्याचे मोबाईलवरून अश्‍लील व्हिडीओ बनविले. हा प्रकार कोणालाही सांगितल्यास हे व्हिडीओ सोशल मीडियावर व्हायरल करण्याचे धमकाविले. बदनामीच्या भीतीने तिने हा प्रकार कोणालाही सांगितला नाही. मात्र, काही दिवसांनी व्हिडीओ सोशल मीडियावर व्हायरल झाल्‍याने हा प्रकार उघडकीस आला. त्यानंतर या तरुणीने मालवणी पोलिस ठाण्यात तक्रार देताच तुपदलविरुद्ध गुन्हा नोंदविला. गुन्हा दाखल केल्यानंतर तीन दिवसांपूर्वी पोलिसांनी आरोपीला अटक केली. त्याला पोलिस कोठडी मिळाली असून त्याची चौकशी सुरू आहे.