विरारमध्ये व्यावसायिकांवर ॲसिड हल्ला

नालासोपारा, ता. १० (बातमीदार) : विरारमधील व्यावसायिकावर मोटरसायकलवरून आलेल्या दोघांनी ॲसिड हल्ला केल्याची घटना उघड झाली आहे. यात व्यावसायिक जखमी झाला असून त्याच्यावर खासगी रुग्णालयात उपचार सुरू आहेत. विरार पूर्व मकवाना कॉम्प्लेक्सजवळ रविवारी (ता. ९) रात्री साडेआठच्या सुमारास ही घटना घडली. मोबिन आसमत शेख (४२) असे हल्ल्यात जखमी झालेल्या व्यावसायिकाचे नाव आहे.
जखमी व्यावसायिक मोबिन शेख यांचा विरार पूर्व गोपचारपाडा येथे एलईडी लाईटच्या सर्व्हिसिंगचा व्यवसाय आहे. रविवारी शेख हे आठवडी बाजार आणण्यासाठी आपल्या स्कुटीवरून जात होते. त्याच वेळी विरार पूर्व मकवाना कॉम्प्लेक्सजवळ अंदाजे २२ वर्षांचे दोन युवक दुचाकीवरून शेख यांच्याजवळ आले. काही कळण्यापूर्वीच त्यांनी प्लास्टिक पिशवीतील ॲसिड शेख यांच्या मानेवर मारून फरार झाले. यात शेख यांच्या मानेला गंभीर दुखापत झाली आहे. ही घटना विरारचे वरिष्ठ पोलिस निरीक्षक राजेंद्र कांबळे, गुन्हे प्रकटीकरण प्रभारी पोलिस निरीक्षक दिलीप राख यांना समजतात त्यांनी तात्काळ एक पथक तयार करून, घटनास्थळावर पाठवून आरोपींचा शोध सुरू केला आहे. या हल्ल्याचे कारण अद्याप स्पष्ट झाले नाही. मुख्य रस्त्यावर हा ॲसिड हल्ला झाला असल्यामुळे व्यापाऱ्यांमध्ये भीतीचे वातावरण पसरले आहे.