ठाकरे गटाचे दुसरे अंबरनाथ शहरप्रमुखही शिवसेनेत

अंबरनाथ, ता. ११ (बातमीदार) : अंबरनाथमधील शिवसेना उद्धव बाळासाहेब ठाकरे पक्षाचे शहरप्रमुख संजय सावंत यांनी नुकताच शिवसेनेत प्रवेश केला आहे. शिवसेनेतील राजकीय घडामोडींनंतर सावंत हे शिवसेनेच्या शिंदे गटात गेलेले दुसरे शहरप्रमुख आहेत. खासदार डॉ. श्रीकांत शिंदे यांच्या उपस्थितीत सावंत यांनी शिवसेनेत प्रवेश केला.
शिवसेना उद्धव बाळासाहेब ठाकरे गटाचे अंबरनाथचे शहरप्रमुख श्रीनिवास वाल्मीकी यांनी चार महिन्यांपूर्वी पदाधिकाऱ्यांसह शिवसेनेत प्रवेश केला होता. त्यानंतर ठाकरे गटाने पुन्हा कार्यकर्त्यांची जमवाजमव करत संजय सावंत यांना ठाकरे गटाच्या शहरप्रमुखाची जबाबदारी सोपवली होती. सचिन अहिर यांच्या उपस्थितीत संजय सावंत यांनी शहरात ठाकरे गटाच्या शाखेचेही उद्‌घाटन केले होते. अशात खासदार आपल्या भेटीला या कार्यक्रमानिमित्त खासदार डॉ. श्रीकांत शिंदे शनिवारी अंबरनाथमध्ये आले होते. तेव्हा डॉ. शिंदे यांच्या उपस्थितीत संजय सावंत यांनी शिवसेनेत प्रवेश केला. त्यामुळे ठाकरे गटाला पुन्हा एकदा शहरप्रमुख शोधण्याची वेळ आली आहे.