जैन साधूच्या हत्येप्रकरणी त्वरित कारवाई करा

मुंबई, ता. ११ : जैन समाजाचे तपस्वी गुरुदेव आचार्य श्री कामकुमार नंदी जी महाराज यांच्या कर्नाटकातील आश्रमात घुसून समाजकंटकांनी त्यांची हत्या केल्याप्रकरणी राज्याचे पर्यटनमंत्री मंगलप्रभात लोढा यांनी काही जैन संघटनांसह महाराष्ट्राचे राज्यपाल रमेश बैस यांची भेट घेऊन दोषींवर त्वरित कारवाई करण्याची मागणी केली आहे. या वेळी श्री दिगंबर जैन ग्लोबल महासभेचे सदस्य आणि भारतवर्षीय दिगंबर जैन कमिटीचे सदस्य उपस्थित होते.

गेल्या आठवड्यात नंदी जी महाराज यांची हत्या झाली होती. हत्येमुळे जैन समाज दुखावला गेला असून, त्यांचा आक्रोश कर्नाटक सरकारने ऐकावा आणि हत्याकांडप्रकरणी त्वरित खटला दाखल करावा, अशी मागणी लोढा यांनी केली आहे. संपूर्ण देशात जैन साधू आणि साध्वी जिथे प्रवास व निवास करतील, अशा ठिकाणी चांगली सुरक्षा व्यवस्था असावी. जैन साधू व साध्वी यांना त्यांच्या पदयात्रेदरम्यान राजकीय अतिथींप्रमाणे पोलिस संरक्षण मिळावे. त्यांच्या विहारादरम्यान होणाऱ्या वाढत्या अपघातांना आळा बसावा यासाठी उपाययोजना कराव्यात, असेही लोढा यांनी निवेदनात म्हटले आहे.