Tesla CFO Vaibhav Taneja : टेस्लावर वैभवराज ! मस्कने लाडक्या कंपनीची जबाबदारी सोपवली भारतीय वंशाच्या तरुणाकडे

नवी दिल्ली : अमेरिकेतील इलेक्ट्रिक वाहन क्षेत्रातील आघाडीची कंपनी ‘टेस्ला’च्या मुख्य वित्तीय अधिकारीपदी (सीएफओ) भारतीय वंशाच्या वैभव तनेजा यांची नियुक्ती करण्यात आली आहे. झकारी किरखोर्न यांनी या पदावरून पायउतार होण्याचा निर्णय घेतल्यानंतर तनेजा यांची नियुक्ती घोषित केली आहे.

कंपनीने सोमवारी याबाबत शेअर बाजाराला माहिती दिली आहे. ४५ वर्षीय तनेजा हे २०१८ पासून मुख्य लेखा अधिकारी (सीएओ) म्हणून काम पाहत असून त्यांच्याकडे सीएफओपदाचीही जबाबदारी सोपवण्यात आली आहे. एलॉन मस्क यांच्या नेतृत्वाखाली किरखोर्न यांची तेरा वर्षांची कारकीर्द राहिली.

या कालावधीत कंपनीचा विस्तार आणि विकासात त्यांची भूमिका महत्त्वाची राहिल्याचे कंपनीने नमूद केले आहे. तसेच, या वर्षाच्या शेवटपर्यंत त्यांची सेवा सुरू राहणार असल्याचेही यात म्हटले आहे. किरखोर्न म्हणाले की, टेस्लाने मी पदावरून पायउतार होत असल्याचे आज सकाळीच घोषित केले. या पदाची जबाबदारी कंपनीचे सीएओ वैभव तनेजा पाहणार आहेत. कंपनीतील माझा अनुभव हा विशेष राहिला आहे. १३ वर्षांत बजावलेल्या कामगिरीचा कायम अभिमान राहील.