तेजस ठाकरेंना सापडली सापाची नवी प्रजाती

सकाळ न्यूज नेटवर्क

मुंबई, ता. २१ : माजी मुख्यमंत्री आणि शिवसेना उद्धव बाळासाहेब ठाकरे गटाचे प्रमुख उद्धव ठाकरे यांचे निसर्गप्रेमी पुत्र तेजस ठाकरे यांना सापाची नवी प्रजाती आढळून आली आहे. आज नागपंचमीच्या मुहूर्तावरच या प्रजातीच्या शोधाला मान्यता मिळाली आहे. ठाकरे वाईल्डलाईफ फाऊंडेशनला पश्चिम घाटात सापडलेल्या या प्रजातीचे नाव ‘सह्याद्रीफोबिस’ किंवा ‘उत्तरघाटी’ असे ठेवण्यात आले आहे.

तेजस ठाकरे आणि हर्षिल पटेल या दोघांच्या संशोधनातून सापडलेल्या या प्रजातीच्या शोधाला लंडन येथील ‘नॅचरल सोसायटी म्युझियम’ आणि जर्मनी येथील ‘मॅक्स प्लॅन्क इन्स्टिट्यूट’ यांनी मान्यता दिली आहे. ‘टॅक्सॉनॉमी’ या जगप्रसिद्ध मासिकाने याबद्दल फाऊंडेशनचे अभिनंदन केले आहे. प्रजातीला नाव देताना पश्चिम घाटातील उत्तरेत हे साप आढळून आले असल्याने ‘उत्तरघाटी’; तर सह्याद्रीत सापडलेले साप म्हणून ‘सह्याद्रीफोबिस’ हे नाव देण्यात आले आहे. फोबिस म्हणजे साप, पश्चिम घाटातील वन आणि प्राणीसंपदा कायम कुतूहलाचा विषय ठरली असून त्यात सतत काहीतरी नवीन सापडत असते, हे पुन्हा सिद्ध झाले आहे.