गुजरात-महाराष्ट्र सीमाप्रश्नांसाठी उद्या बैठक

कासा, ता. २० (बातमीदार) : पालघर जिल्ह्यातील तलासरी तालुक्यातील वेवजी आणि झाई ग्रामपंचायत हद्दीत गुजरात राज्याकडून झालेल्या अतिक्रमणाविषयी सविस्तर चर्चा करण्यासाठी डहाणू विधानसभा आमदार विनोद निकोले यांनी सर्व संबंधित सरकारी यंत्रणांसह शुक्रवारी (ता. २२) डिसेंबरला बैठकीचे आयोजन केले आहे.
गुजरात-महाराष्ट्र सीमेवर असलेल्या तलासरी तालुक्यातील वेवजी आणि झाई ग्रामपंचायतीत गुजरातमधील उंबरगाव तालुक्यातील सोलसुंबा आणि गोवाडा ग्रामपंचायतीमार्फत अतिक्रमण केल्याचा मुद्दा काही वर्षांपासून चर्चेत आला आहे. याविषयी वेळोवेळी विधानसभेत प्रश्‍न उपस्थित होऊनही यावर मार्ग काढण्यासाठी सरकारी यंत्रणा अपयशी ठरत आहे. याविषयी मार्ग काढण्याच्या उद्देशाने आमदार निकोले यांनी बैठकीचे आयोजन केले आहे. या बैठकीसाठी तलासरी तहसीलदारांसह तालुक्यातील उपअधीक्षक भूमी अभिलेख, उपअभियंता सार्वजनिक बांधकाम विभाग, गटविकास अधिकारी, वेवजीचे मंडळ अधिकारी, तत्कालीन ग्रामविकास अधिकारी यांच्यासह इतर संबंधित सरकारी अधिकारी कर्मचाऱ्यांना येथे दोन्ही सीमा भागांतील सर्व कागदपत्रे आणि संबंधित जागेच्या मोजणी नकाशासह उपस्थित राहण्याची सूचना आमदार निकोले यांनी दिली आहे.