Ram Mandir: श्रीराम मंदिराचा प्राणप्रतिष्ठा सोहळ्या निमित्त मिरा-भाईंदरमध्ये ५१ हजार किलो साखरवाटप

Ram Mandir: अयोध्येत प्रभू श्रीराम मंदिराचा प्राणप्रतिष्ठा सोहळा २२ जानेवारी रोजी होणार आहे. यानिमित्त आमदार प्रताप सरनाईक यांच्याकडून मिरा-भाईंदरमध्ये रामभक्तांना ५१ हजार किलो साखर प्रसाद म्हणून वाटप केले जाणार आहे. त्याचप्रमाणे शहरात दोन ठिकाणी महाआरतीचे आयोजन करण्यात आले असून त्यासाठी उत्तर प्रदेशातून खास ११ पुरोहितांना निमंत्रित करण्यात आले आहे.

मिरा-भाईंदरमध्येही श्री राममय वातावरण तयार झाले असून २२ जानेवारीला दिवाळी साजरी केली जाणार आहे. २२ जानेवारीला सकाळी १० वाजता काशी-मिरा येथील जरीमरी तलाव व सायंकाळी ७ वाजता भाईंदर पूर्व येथील एस. एन. महाविद्यालयासमोरील नवघर तलाव या दोन ठिकाणी महाआरती होणार आहे. यासाठी उत्तर प्रदेशातील जबलपूर येथून खास ११ पुरोहित बोलावण्यात आले आहेत. अयोध्येत शरयू नदीच्या तीरावर महाआरती केली जाते, त्याच पद्धतीने आरती करणारे ब्राह्मण आणि तसेच मोठे दिवे आणले जाणार आहेत. यानिमित्त संपूर्ण मिरा-भाईंदरमध्ये फटाके फोडून, ढोल-ताशे वाजवून, पेढे वाटून आनंद साजरा केला जाणार व यानिमित्त ५१ हजार किलो साखर वाटप केले जाणार आहे. त्याचबरोबर विविध कार्यक्रमही शिवसेनेकडून आयोजित करण्यात आले आहेत. प्राणप्रतिष्ठा सोहळ्याची थेट दृश्य मोठ्या स्क्रीनवर दाखविण्यात येणार आहेत, अशी माहिती आमदार सरनाईक यांनी दिली.