Bailgada Sharyat: बैलगाडी शर्यतीचे श्रेय देवेंद्र फडणवीसांना; भाजप नेत्यांनी केले कौतुक

Mumbai News: सर्वोच्च न्यायालयाच्या आदेशाने शेतकऱ्यांचा बैलगाडी शर्यतीचा खेळ सुरू झाला. मात्र, त्याचे खरे श्रेय उपमुख्यमंत्री देवेंद्र फडणवीस यांचे असल्याची स्तुतिसुमने माजी मंत्री सदाभाऊ खोत, तसेच भाजप नेते प्रवीण दरेकर आदींनी उधळली.

सांगली येथील देवेंद्र फडणवीस चषक बैलगाडी शर्यतीच्या वेळी ते बोलत होते. मध्यंतरी बैलगाडी शर्यतीवर बंदी आली होती. मात्र, सदाभाऊ खोत, गोपीचंद पडळकर यांच्या पुढाकाराने बंदीविरोधात सर्वोच्च न्यायालयात याचिका करण्यात आली.

दरम्यान, उपमुख्यमंत्री देवेंद्र फडणवीस यांनी स्वतः या प्रकरणात लक्ष देत बैलगाडी शर्यतीसाठी विधिमंडळात कायदा केला. त्यानंतर सर्वोच्च न्यायालयाच्या माध्यमातून बैलगाडी शर्यतीचा खेळ पुन्हा सुरू झाला.

त्यामुळे शेतकऱ्यांना उपजीविकेचे साधन मिळाले आहे, असे दरेकर यांनी सांगितले. या शर्यतीचे बक्षीस आम्ही दरवर्षी एक एक लाख रुपयांनी वाढवणार आहोत.

कारण ग्रामीण भागातील देशी गाईला वाचविण्याचे काम खऱ्या अर्थाने फडणवीस यांनी केले. म्हणून त्यांच्या नावाने ही शर्यत ठेवली, असे माजी मंत्री सदाभाऊ खोत म्हणाले.