चोरीप्रकरणी महिलेस अटक

चोरीप्रकरणी महिलेस अटक
अंधेरी, ता. ४ (बातमीदार) ः धार्मिक कार्यक्रमांत चोरी करणाऱ्या हर्षा अनिल वासवानी या महिलेस बांगुरनगर पोलिसांनी अटक केली. तिला बोरिवलीतील स्थानिक न्यायालयात हजर करण्यात आले होते.
तक्रारदार महिला मालाड येथे राहते. गेल्या आठवड्यात ती मालाड येथील एका धार्मिक कार्यक्रमात गेली होती. तिथल्‍या गर्दीचा फायदा घेऊन अज्ञात व्यक्तीने तिची पर्स चोरी केली. घरी आल्यानंतर तिला हा प्रकार लक्षात आला. त्यामुळे तिने बांगुरनगर पोलिसांत तक्रार केली होती. चोरीचा गुन्हा नोंदवून पोलिसांनी धार्मिक कार्यक्रमातील सीसीटीव्ही फुटेजची पाहणी केली होती. या फुटेजमध्ये हर्षा ही तक्रारदार महिलेची पर्स चोरी करताना दिसून आली. या फुटेजवरून तिची माहिती काढून तिला मालाड येथून पोलिसांनी चौकशीसाठी ताब्यात घेतले होते. तिनेच ही चोरी केल्याची कबुली दिली. ती सध्या पोलिस कोठडीत असून तिची पोलिसांकडून चौकशी सुरू आहे.