Navi Mumbai Police: नवी मुंबई पोलिस गडचिरोलीत कर्तव्यावर; तीनशे अंमलदारांसह दहा अधिकारी जाणार

Panvel News: लोकसभा निवडणुकीच्या पहिल्या टप्प्यात गडचिरोली येथे मतदान होत आहे. या नक्षली आणि दुर्गम भागामध्ये मतदानप्रक्रिया निर्भय वातावरणात पार पाडावी, यासाठी नवी मुंबई पोलिस दलातील तीनशे अंमलदारांसह दहा अधिकारी जाणार आहेत.(navi mumbai crime)

देशामध्ये लोकसभेची सात टप्प्यांमध्ये निवडणूक होत आहे. पहिल्या टप्प्यात १९ एप्रिल रोजी महाराष्ट्रातील काही मतदारसंघांमध्ये मतदान होत आहे. त्यामध्ये गडचिरोली, चिमूरचा समावेश आहे. अतिदुर्गम अशा या मतदारसंघात मतदान केंद्रे दूर आहेत.(gadchiravli police)

तसेच बराचसा भाग हा नक्षलग्रस्त असल्याने निर्भय वातावरणामध्ये निवडणुका घेणे आव्हानात्मक असते. त्यामुळे स्थानिक पोलिसांबरोबरच बंदोबस्तासाठी बाहेरची कुमक मागवली गेली. नवी मुंबई पोलिस मुख्यालयातून शंभर जणांच्या तीन तुकड्या जाणार आहेत.(pavel crime news)

यातील पहिली तुकडी गुरुवारी (ता. ११) गडचिरोलीकडे रवाना झाली असून मुख्यालय, वाहतूक, गुन्हे आणि स्थानिक पोलिस ठाण्यातील अंमलदारांचा समावेश आहे.

गडचिरोली लोकसभा मतदारसंघामध्ये राज्यातील इतर भागांतून बंदोबस्तासाठी पोलिसांची फौजफाटा मागवण्यात आला आहे. त्यामध्ये नवी मुंबईतून तीन तुकड्या जाणार आहेत. त्याचबरोबर पहिल्या टप्प्यातील निवडणुकीसाठी काही अधिकारीही गडचिरोलीत तैनात करण्यात येणार आहेत.

- संजय कुमार पाटील, उपायुक्त, पोलिस मुख्यालय, मुंबई