Bhiwandi Loksabha: भिवंडीवर काँग्रेसचा दावा कायम; पक्षश्रेष्ठींनी निर्णय घ्यावा अशी घेतली भुमिका

Thane News: महाविकास आघाडीच्या जागावाटपात राष्ट्रवादीकडे गेलेल्या भिवंडी लोकसभा मतदारसंघात दोन दिवसांचे सर्वेक्षण करून पक्षश्रेष्ठींनी निर्णय घ्यावा, अशी मागणी काँग्रेसचे ठाणे ग्रामीण जिल्हा अध्यक्ष दयानंद चोरघे यांनी केली आहे.

त्यामुळे भिवंडी मतदारसंघ सोडण्यास काँग्रेसचे स्थानिक पदाधिकारी तयार नसल्याचे पुन्हा एकदा समोर आले आहे.

भिवंडी लोकसभा मतदारसंघाच्या जागेवरून सुरू असलेला महाविकास आघाडीचा तिढा राष्ट्रवादी शरद पवार गटाचे उमेदवार बाळ्यामामा यांच्या उमेदवारीने सुटला आहे. जागावाटपातही त्यावर शिक्कामोर्तब झाले आहे.

मात्र ही जागा ‘हात’ची गेल्याने भिवंडी लोकसभा मतदारसंघातील काँग्रेस पदाधिकाऱ्यांसह इच्छुक उमेदवार असलेले दयानंद चोरघे यांच्या ही बाब जिव्हारी लागली आहे. पक्षश्रेष्ठीने या जागेवरून समजूत काढल्यानंतरही मागे हटण्यास तयार नसून अपक्ष लढण्याची तयारी त्यांनी सुरू केली आहे.

याच अनुषंगाने गुरुवारी चोरघे यांच्या निवासस्थानी ग्रामीण ठाणे जिल्हा कमिटीच्या पदाधिकाऱ्यांची बैठक घेत पक्षश्रेष्ठींवर दबाब आणण्याचा शेवटचा प्रयत्न केला गेला आहे. या वेळी भिवंडीत पहिल्या क्रमांकाची मते शिवसेनेची आहेत; तर दुसऱ्या क्रमांकावर काँग्रेस असल्याचा दावा चोरघे यांनी केला.

तसेच शहापूर, मुरबाडमध्ये ताकद नसताना कोणत्या आधारावर ही जागा राष्ट्रवादी शरद पवार गटाला सोडली, असा सवाल उपस्थित करत महाविकास आघाडीचा उमेदवार असलेल्या सुरेश ऊर्फ बाळ्यामामा यांना मतदारसंघात कोणीही ओळखत नसल्याचा टोलाही लगावला आहे.

राजकारणात भाऊबंदकी नसते

दयानंद चोरघे आपले छोटे भाऊ आहेत. त्यांचा राग आपण शांत करू, असे सुरेश म्हात्रे म्हणाले होते. चोरघे यांनीही ते आपले मोठे भाऊ आहेत; पण हे राजकारण आहे. येथे छोटा-मोठा भाऊ हे बाजूला ठेऊन काम करायचे असते, असा टोला लावला आहे.