Mumbai News: मुंबईजवळ या ठिकाणी होत आहे बिबट्याचा वावर; परिसरात भितीचे वातावरण

Mumbai News: भाईंदरजवळील उत्तन परिसरात पुन्हा बिबट्याचा वावर सुरू झाला आहे. केशवसृष्टी परिसरातील एका घराबाहेर लावलेल्या सीसी टीव्हीत बिबट्या कैद झाला आहे. त्यामुळे परिसरात पुन्हा एकदा भीतीचे वातावरण पसरले आहे. गेल्या वर्षी मार्चमध्येही या भागात बिबट्याचा वावर होता. त्यावेळी स्थानिकाने लावलेल्या पिंजऱ्यात बिबट्या अडकला होता.

उत्तन येथील केशवसृष्टी परिसरात बिवट्याचा वावर असल्याचा संशय स्थानिकांना गेल्या दहा ते बारा दिवसांपासून येत होता. त्यातच या भागात राहणारे डॉमनिक नुनीस यांच्या घराच्या मागील भागात असलेल्या कोंबड्या गायब झाल्याने त्यांचा संशय बळावला. याठिकाणी घराबाहेर त्यांनी सीसी टीव्ही बसवला आहे. परंतु तो बंद होता. त्यांनी तातडीने सीसी टीव्ही दुरुस्त करून घेतला. त्यात रविवारी (ता. २१) पहाटे साडेतीन वाजण्याच्या सुमारास बिबट्या कैद झाला. नुनीस यांच्या घराच्या मागे असलेली कोंबडी पकडून नेत असताना बिबट्या सीसी टीव्हीत दिसून आला. स्थानिकांनी त्याची माहिती वनविभागाला दिली.

दरम्यान, गेल्या वर्षीदेखील मार्चमध्ये उत्तन येथील पालखाडी, कोपरा या भागात बिबट्या वावरत होता. त्याठिकाणी त्याच्या पावलाचे ठसे दिसून आले होते व परिसरातील कुत्रे, कोंबड्या नाहीशा होत होत्या. भीतीपोटी स्थानिक रहिवाशाने लावलेल्या पिंजऱ्यात त्यावेळी बिबट्या अडकला होता. त्यानंतर वनविभागाने बिबट्याला ताब्यात घेतले होते. आता पुन्हा या भागात बिबट्याचे दर्शन झाले असल्याने रहिवाशांमध्ये भीतीचे वातावरण आहे.

वनविभागाने परिसरात तीन ठिकाणी कॅमेरे बसवले आहेत. या कॅमेऱ्यात बिबट्याच्या हालचाली कैद झाल्यानंतर त्याचा वावर समजून येणार आहे. त्यानंतर त्याला पकडण्यासाठी पिंजरे बसविण्यात येतील, तोपर्यंत परिसरातील रहिवाशांना काय दक्षता घ्यायची, यासंदर्भात मार्गदर्शन करण्यात येणार आहे.
- राकेश भोईर,
वनक्षेत्रपाल, वन विभाग