महापालिका मुख्यालयातील वातानुकूलित यंत्रणा ठप्प

महापालिका मुख्यालयातील वातानुकूलित यंत्रणा ठप्प
अधिकारी- कर्मचारी बेहाल; पंधरा दिवसांपासून दुरुस्‍तीचे काम सुरू
वाशी, ता. २९ (बातमीदार) : बेलापूर येथील नवी मुंबई महापालिकेच्या मुख्यालयात मागील पंधरा दिवसांपासून वातानुकूलित यंत्रणा बंद असल्‍याने उकाड्यामुळे अधिकारी- कर्मचारी बेहाल झाले आहेत. तर काही अधिकाऱ्यांच्‍या दालनामध्ये गरमीमुळे पंखे लावून बसण्याची वेळ आली आहे. यामुळे कर्मचारी- अधिकाऱ्यांनी संताप व्यक्त केला आहे.
नवी मुंबई महापालिकेचे मुख्यालय ग्रीन इमारत म्हणून ओळखली जाते. ही इमारत पूर्णता वातानुकूलित आहे. जवळपास या इमारतीसाठी ८०० टनांचे दोन वातानुकूलित यंत्रणा बसवण्यात आल्या आहेत. मात्र, मागील पंधरा दिवसांपासून यामधील एका मशीनमध्ये बिघाड झाला आहे. त्याच्या दुरुस्तीचे काम सुरू आहे. त्यामुळे फक्त एकाच मशीनवर इमारतीचे वातावरण थंड ठेवण्याचा प्रयत्‍न केला जात आहे. सध्या तीव्र उन्हाळा सुरू असून पारा चाळिशी पार गेला आहे. त्‍यामुळे ही इमारत पूर्णपणे थंड होत नसल्यामुळे अधिकारी- कर्मचाऱ्यांना उकाड्यामध्ये काम करावे लागत आहे. दहा वर्षांपूर्वी बसवण्यात आलेल्या या मशीन नादुरुस्त झाल्यामुळे ऐन उन्‍हाळ्यात अधिकारी- कर्मचारी यांना त्रास सहन करावा लागत आहे. तर वातानुकूलित यंत्रणा विदेशी असल्‍याने तिच्‍या दुरुस्‍तीसाठी वेळ लागत असल्‍याचे सांगण्यात येत आहे. येत्या दोन ते तीन दिवसांत काम पूर्ण होईल, असा विश्वास अंभियता विभागाकडून व्‍यक्‍त करण्यात येत आहे.