Navi Mumbai Crime: कमी किमतीत सोने खरेदीचे प्रलोभन, महिलेला २८ लाखांचा गंडा

Navi mumbai crime: बाजारभावापेक्षा कमी किमतीत अर्धा किलो सोने देण्याचे प्रलोभन दाखवून महिला बँक व्यवस्थापकला तब्बल २७ लाख ८१ हजार रुपयांना लुटल्याची घटना घडली होती. या प्रकरणातील फरार टोळीतील दोघांना नेरूळ पोलिसांनी बुधवारी (ता. २९) अटक केली.

राकेश शिवाजी शिंगटे (वय ४२) व रूपेश सुभाष सपकाळे (वय ४२) हे १८ मे रोजी नेरूळमधील डी. वाय. पाटील कॉलेजच्या गेटवरून ही रक्कम घेऊन पसार झाले होते.

तक्रारदार ३८ वर्षीय महिला कामोठे येथे राहत असून, त्या एका बँकेत व्यवस्थापक म्हणून कार्यरत आहेत. राकेश शिंगटे या बँकेच्या खातेदारासोबत त्यांची ओळख झाली होती.

या ओळखीचा फायदा घेत शिंगटे याने बाजारभावापेक्षा कमी किमतीत अर्धा किलो सोने देण्याचे प्रलोभन त्यांना दाखवले. त्या प्रलोभनाला बळी पडून तक्रारदार महिलेने सोने घेण्याची तयारी दर्शवली होती. त्यामुळे महिलेला आरोपी शिंगटे याने १८ मे रोजी २७ लाख ८१ हजार रुपये घेऊन नेरूळ रेल्वे स्टेशनजवळ बोलवले. त्यानंतर डॉ. डी. वाय. पाटील कॉलेजजवळ बोलवले. तिथे शिंगटेसोबत त्याचा मित्र राकेश सपकाळे आला होता.

त्यानंतर महिलेला त्यांनी सानपाडा येथे घेऊन जाऊन इतर तिघांनी धमकावून महिलेकडील २७ लाख ८१ हजाराची रोख रक्कम घेऊन पलायन केले. महिला बँक व्यवस्थापकाची लूट केल्यानंतर त्यांनी बुधवारी पैसे लुटणाऱ्यांविरोधात तक्रार दाखल केली. त्यानंतर आरोपी राकेश शिंगटे व रूपेश सपकाळे या दोघांना पोलिसांनी अटक केली. या प्रकरणाचा पुढील तपास सहायक पोलिस निरीक्षक सचिन ढगे करत आहेत.