चेंबूर येथे गॅस सिलेंडर स्फोटात ९ जण जखमी

सकाळ वृत्तसेवा
मुंबई, ता. ६ : चेंबूर परिसरातील गोल्फ क्लबजवळ असलेल्या एकमजली घरात झालेल्या सिलिंडर स्फोटात नऊ जण जखमी झाल्याची घटना गुरुवारी सकाळी पावणेआठ वाजता घडली. यात नऊ जण जखमी झाले असून एकाच कुटुंबातील आठ जणांचा समावेश आहे. अग्निशमन दलाला माहिती मिळताच त्यांनी तत्काळ घटनास्थळी धाव घेत बचावकार्य सुरू केले. तासाभरातच आगीवर नियंत्रण मिळवण्यात यश आल्याची माहिती पालिकेच्या आपत्कालीन नियंत्रण कक्षाने दिली.

चेंबूर परिसरातील गिडवाणी मार्गावर झालेल्या स्फोटामुळे संपूर्ण परिसर हादरला. स्फोटाच्या आवाजाने बाजूच्या घरांच्या आणि वाहनांच्या काचा फुटल्या. अचानक झालेल्या मोठ्या आवाजाने परिसरात नागरिकांमध्ये भीतीचे वातावरण निर्माण झाले होते. ओम लिंबाजिया (९), अजय लिंबाजिया (३३), पूनम लिंबाजिया ( ३५), मेहक लिंबाजिया (११), ज्योत्स्ना लिंबाजिया (५३), पीयूष लिंबाजिया (२५), नितीन लिंबाजिया (५५), प्रीती लिंबाजिया (३४), सुदाम शिरसाट (५५) अशी जखमींची नावे आहेत. या घटनेची पोलिस, अग्निशमन दल आणि संबंधित यंत्रणांकडून चौकशी सुरू असल्याचे सांगण्यात आले.
---
आठ जखमींना ऐरोलीत हलवले
गोवंडीतील शताब्दी रुग्णालयात उपचार केल्यानंतर ५० टक्के भाजलेल्या आठ रुग्णांना ऐरोली येथील नॅशनल बर्न केंद्रात दाखल करण्यात आले आहे. एकावर सायन रुग्णालयात उपचार सुरू आहेत. ज्योत्स्ना लिंबाचिया या ६५ टक्के भाजल्या असून त्यांची प्रकृती चिंताजनक आहे. प्रिती लिंबाचिया या ४५ ते ५० टक्के भाजल्या असून संसर्गाचा धोका असल्याने प्रतिबंधात्मक उपचार म्हणून नॅशनल बर्न केंद्रात पाठवण्यात येणार आहे. नऊ वर्षीय मुलाचाही यात समावेश असल्याचे वैद्यकीय अधीक्षक डॉ. सुनील पाकळे यांनी सांगितले. घटनेनंतर खासदार अनिल देसाई यांनी गोवंडी रुग्णालयात दाखल रुग्णांची भेट घेऊन त्यांची विचारपूस केली.