महामार्गावर ट्रक उलटून अपघात

कासा (बातमीदार) : मुंबई-अहमदाबाद महामार्गावर सोमटा गावात मालवाहू ट्रक उलटून भीषण अपघात झाला. अपघातग्रस्त ट्रक महामार्गावरून साधारण ३० फूट खाली कोसळला होता. या दुर्घटनेत चालकाला किरकोळ दुखापत झाली आहे. महामार्गावर शनिवारी (ता. ८) दुपारी दोन वाजण्याच्या सुमारास गुजरातच्या दिशेला जाणाऱ्या ट्रकसमोर सायकलचालक आल्याने त्याला वाचवण्याच्या प्रयत्नात ट्रकचालकाचा ताबा सुटून ट्रक महामार्गावरून खाली कोसळून अपघात झाला आहे. ट्रकमध्ये रंगांचे डबे वाहून नेण्यात येत असून मालाचे मोठे नुकसान झाले आहे. महामार्ग प्रशासन, महामार्ग आणि कासा पोलिसांनी घटनास्थळी दाखल होत चालकाला उपचारासाठी कासा उपजिल्हा रुग्णालयात पाठवले होते.