बाह्यवळण मार्गावर दरड कोसळली

कळवा (बातमीदार)ः दोन दिवसांपासून सुरू असलेल्या मुसळधार पावसामुळे मुंब्रा बाह्यवळण मार्गावर डोंगराचे पाणी जाण्यासाठी चर खोदण्याचे काम सुरू असताना दरड कोसळली. सोमवारी (ता. ९) रात्री पावणेदहाच्या सुमारास घडलेल्या या घटनेमुळे काही काळ वाहतूक कोंडी झाली होती. दरड कोसळल्यानंतर आपत्ती व्यवस्थापन कक्षाच्या कर्मचाऱ्यांनी रात्री उशिरापर्यंत माती हटवण्याचे काम सुरू केले होते. त्यानंतर वाहतूक पूर्ववत झाली. या घटनेत कोणीही जखमी झालेले नाही; परंतु पावसाचा जोर वाढत असल्याने काळजी घेण्याचे आवाहन वाहनचालकांना केले आहे.