आमदार मोहिते-पाटलांची भाजपमधून हकालपट्टी करावी ः राम सातपुते

आमदार मोहिते-पाटलांची भाजपमधून हकालपट्टी करावी ः राम सातपुते
नातेपुते, ता. २४ ः विधान परिषद सदस्य रणजितसिंह मोहिते-पाटील यांची भाजपमधून हकालपट्टी करावी, अशी मागणी भाजपचे पराभूत उमेदवार राम सातपुते यांनी कार्यकर्त्यांच्या बैठकीत केली असून तशाच प्रकारची पोस्ट एक्स (ट्विटर) केली आहे. आज दिवसभर ही पोस्ट चर्चेत होती.
माढा लोकसभा मतदारसंघात भाजपचा दारुण पराभव झाला होता. त्यावेळीही विधान परिषद सदस्य रणजितसिंह मोहिते पाटील हे आपल्या बंधूंमुळे प्रचारापासून अलिप्त राहिले होते. रणजितसिंह मोहिते पाटील यांना भारतीय जनता पक्षाने विधान परिषद दिली आहे. सदाशिवनगर येथील श्री शंकर सहकारी साखर कारखान्याला मोठी आर्थिक ताकद दिली. तरीही त्यांनी नुकत्याच झालेल्या विधानसभा निवडणुकीत पक्षाचे काम केले नाही. उलटपक्षी पराभवासाठी पैशांचे वाटप केले. भाजपच्या कार्यकर्त्यांना, पोलिंग एजंटला धमक्या दिल्या. पक्षविरोधी भूमिका घेतली. त्यामुळे पक्षाने त्यांना निलंबित करावे, अशा प्रकारची मागणी सातपुते यांनी केली आहे.