टेम्पो-दुचाकींचा भीषण अपघात

टेम्पो-दुचाकींचा भीषण अपघात
चार जण गंभीर जखमी; उपचारादरम्यान एकाचा मृत्यू

पोलादपूर, ता. १० (बातमीदार) ः मुंबई-गोवा महामार्गावर मुंबईकडून पोलादपूरकडे भरधाव वेगाने जाणाऱ्या टेम्पोची ठोकर दुचाकीला बसल्याने दुचाकीवरील चालक व सहकारी गंभीर जखमी झाल्याची घटना बुधवारी (ता. ९) रात्री १०.१५ वाजण्याच्या सुमारास घडली. या अपघातात चार जण गंभीर जखमी झाले असून, दुचाकीस्वाराचा माणगाव येथे उपचारादरम्यान मृत्यू झाला, तर तीन गंभीर जखमींना मुंबईला हलविण्यात आले आहे.
हा अपघात लोहारमाळ गावच्या हद्दीत झाला. फिर्यादी गणेश महादेव येरुणकर (वय ४१, रा. पोलादपूर) यांचा भाचा सुनील सुरेश पवार दुचाकीवरून पत्नी व दोन मुलांना घेऊन जात होते. त्या वेळी टेम्पोचालक अतुल अजित कातवणकर (वय ३५, रा. मिठबाग, ता. देवगड, जि. सिंधुदुर्ग) त्याच्या ताब्यातील टेम्पो भरधाव वेगाने मार्गस्थ करीत पुढे जाणाऱ्या दुचाकीला डाव्या बाजूने ओव्हरटेक करीत असताना ठोकर बसली. या अपघातात सुनील पवार (वय ४१), सुवर्णा सुनील पवार (वय ३९), श्लोक सुनील पवार (वय १३), रिया सुनील पवार (वय १०) असे चार जण जखमी झाले. या सर्वांना सर्वप्रथम पोलादपूर ग्रामीण रुग्णालयात दाखल करण्यात आले; मात्र सुनील याचा उपचारादरम्यान मृत्यू झाला. तिघांना पुढील उपचारासाठी मुंबईला हलविण्यात आले. आरोपी अतुल अजित कातवणकर याच्याविरोधात गुन्हा दाखल करण्यात आला आहे.