पालघरमध्ये आजपासून विशेष स्वच्छता अभियान

पालघर (बातमीदार) : राज्य सरकारच्या पाणीपुरवठा व स्वच्छता विभागाच्या आदेशानुसार पालघर जिल्ह्यात ‘कंपोस्ट खड्डा भरू, आपले गाव स्वच्छ ठेवू!’ हे विशेष स्वच्छता अभियान उद्या (ता. १ मे)पासून राबवले जाणार आहे. या अभियानाची सुरुवात कोळगाव येथे पालघर जिल्ह्याचे पालकमंत्री गणेश नाईक यांच्या हस्ते होणार आहे. या अभियानाचा उद्देश ग्रामीण भागात ओल्या कचऱ्याचे योग्य व्यवस्थापन करून कंपोस्ट व गांडूळ खतनिर्मिती करणे आहे. स्वच्छ भारत मिशन (ग्रामीण) टप्पा दोनअंतर्गत ग्रामस्थांनी नियोजनबद्ध वापर करून आपले गाव कायमस्वरूपी स्वच्छ ठेवावे. या अभियानात प्रत्येक ग्रामस्थाने सक्रिय सहभाग घ्यावा, असे आवाहन राज्याचे पाणीपुरवठा व स्वच्छतामंत्री गुलाबराव पाटील यांनी केले आहे. १ मे ते ३० सप्टेंबरपर्यंत हे अभियान राबवले जाणार आहे.