अग्निशमन कर्मचाऱ्यांसाठी पशू-पक्षी बचाव प्रशिक्षण

पनवेल, ता. ५ (बातमीदार) : पनवेल महापालिका आयुक्त मंगेश चितळे यांच्या निर्देशानुसार महापालिकेच्या पशुवैद्यकीय विभागाच्या वतीने अग्निशमन विभागातील अधिकारी व कर्मचाऱ्यांसाठी पशू-पक्षी बचाव प्रशिक्षण कार्यशाळा पार पडली. ‘मिशन रेबीज’ संस्थेच्या सहकार्याने २८ व २९ एप्रिलला आद्य क्रांतिकारक वासुदेव बळवंत फडके नाट्यगृहात हे प्रशिक्षण घेण्यात आले.
शहरातील विविध ठिकाणी अडकलेले, अपघातग्रस्त किंवा नाल्यात अडकलेले प्राणी व पक्षी वाचवताना अग्निशमन कर्मचाऱ्यांना अडचणींचा सामना करावा लागतो. ही गरज लक्षात घेऊन प्रशिक्षित कर्मचाऱ्यांची फळी तयार करण्यासाठी हा उपक्रम राबवण्यात आला. झीरो रेबीज निर्मूलन कार्यक्रमांतर्गत अग्निशमन कर्मचाऱ्यांना हे प्रशिक्षण देण्यात आले. शिबिरात मिशन रेबीजचे डॉ. शशिकांत जाधव आणि डॉ. आश्विन सुशीलन यांनी सहभागी कर्मचाऱ्यांना प्राणी बचावाच्या सुरक्षित पद्धती, प्राणीवर्तनाचे निरीक्षण, प्राणीजन्य आजार आणि रेबीजवरील प्रतिबंधात्मक उपाय यांची माहिती दिली. उपायुक्त डॉ. वैभव विधाते व मुख्य वैद्यकीय अधिकारी डॉ. आनंद गोसावी यांच्या सूचनेनुसार या कार्यक्रमाचे आयोजन सहाय्यक आयुक्त डॉ. रूपाली माने, डॉ. बी. एन. गीते व डॉ. मधुलिका पी. लाड यांनी केले.