नाट्यगृहातील सीलिंगचा काही भाग कोसळला

सावित्रीबाई फुले नाट्यगृह १५ जूनपर्यंत बंद
सीलिंगचा काही भाग कोसळला

सकाळ वृत्तसेवा
डोंबिवली, ता. २४ : कल्याण डोंबिवली महापालिकेच्या डोंबिवलीतील सावित्रीबाई फुले नाट्यगृहातील १५ जूनपर्यंतचे सर्व शो रद्द करण्यात आले आहेत. शुक्रवारी (ता. २३) दुपारी नाट्यगृहाच्या सीलिंगचा काही भाग कोसळल्याने सुरक्षिततेच्या कारणास्तव नाट्यगृह बंद ठेवण्यात आल्याचे प्रशासनाच्या वतीने सांगण्यात आले. ऐन सुट्टीच्या हंगामात नाट्यगृह बंद झाल्याने नाट्यरसिकांचा हिरमोड झाला आहे.

सावित्रीबाई फुले नाट्यगृह हे डोंबिवलीकरांच्या सांस्कृतिक वारशाचे मानबिंदू आहे, असे म्हटले जाते; मात्र या नाट्यगृहाला लागलेले ग्रहण काही संपताना दिसत नाही. नाटकांच्या बुकिंग तारखांचा घोळ, दुरवस्था, भाडेवाढ आदी अनेक कारणांमुळे हे नाट्यगृह कायम वादग्रस्त राहिले आहे. अनेक कलाकारांनी यावर आवाज उठविल्यानंतर या नाट्यगृहातील दालनांची दुरुस्ती केली होती. यानंतर येथे नाट्यप्रयोग चांगल्या पद्धतीने होऊ लागले होते; मात्र निवडणुकीच्या कालावधीत हे नाट्यगृह निवडणूक आयोगाच्या कामामुळे बंद ठेवले. त्यामुळे ठरावीक कालावधीत हे नाट्यगृह कलाकार, आयोजक तसेच रसिक प्रेक्षकांसाठी उपलब्ध असते.

मे महिना सुट्टीचा काळ असल्याने या ठिकाणी नाटकांचे हाऊसफुल प्रयोग सध्याच्या घडीला होत होते; मात्र शुक्रवार दुपारपासूनचे पुढील सर्व शो रद्द करण्यात आले आहेत. शुक्रवारी दुपारी एका शोदरम्यान सीलिंगच्या पीओपीचा काही भाग हा प्रेक्षागृहात कोसळला. यामुळे नाट्यरसिकांमध्ये काही काळ भीतीचे वातावरण निर्माण झाले. तसेच सुरक्षिततेच्या कारणास्तव त्वरित तो शो रद्द करीत नाट्यगृह रिकामे करण्यात आले. तसेच पुढील वीस दिवसांसाठी हे नाट्यगृह बंद ठेवल्याची माहिती पालिका प्रशासनाकडून देण्यात आली.

२००७ मध्ये सावित्रीबाई फुले नाट्यगृह सुरू झाले. नाट्यगृहाच्या बांधकामाला १८ ते १९ वर्षे झाल्याने त्याची दुरवस्था झाली आहे. अनेक ठिकाणी गळती लागली आहे. पावसाचे दिवस असल्याने फॉल सीलिंगचा धोका जास्त संभवतो. स्ट्रक्चरल ऑडिटची टीम पाहणी करून गेली आहे. सोमवारी त्याचा सविस्तर आढावा घेण्यात येईल. पाठीमागील बाजूला थोडे लिकेज असल्याने त्याचेही काम त्वरित करून घ्यावे लागणार आहे. सीलिंगचा दोन ते तीन ठिकाणच्या पीओपीचा भाग कोसळला आहे. या पीओपीला वजन जास्त असून जास्त उंचीवरून हा भाग कोसळून नागरिकांच्या जीवास धोका होण्याची भीती आहे.

नाट्यगृह व्यवस्थापक माणिक शिंदे यांनी सांगितले, ‘सावित्रीबाई फुले नाट्यगृहाच्या सीलिंगचा काही भाग शुक्रवारी दुपारी कोसळल्याने नाट्यगृह बंद आहे. पुढील नाटकांचे प्रयोग रद्द केले आहेत. तसेच नागरिकांच्या सुरक्षिततेसाठी १५ जूनपर्यंत नाट्यगृह बंद ठेवण्याचा निर्णय पालिका आयुक्तांच्या संमतीने पालिका प्रशासनाने घेतल्याची माहिती कार्यकारी अभियंता रोहिणी लोकरे यांनी दिली.

नाट्यरसिकांना महापालिकेचे आवाहन
नाट्यगृहातील सीलिंगचा तुकडा अचानक तुटून खाली पडल्याने महापालिकेच्या शहर अभियंता अनिता परदेशी, प्रकल्प विभागाच्या कार्यकारी अभियंता रोहिणी लोकरे, कार्यकारी अभियंता मनोज सांगळे यांनी समक्ष जाऊन नाट्यगृहाची पाहणी केली. तसेच स्ट्रक्चरल इंजिनिअरला अहवाल देण्याबाबत निर्देश दिले. तसेच पावसाळ्याच्या पार्श्वभूमीवर सावित्रीबाई फुले कलामंदिरच्या दुरुस्तीसाठी नाट्यगृह काही काळ बंद ठेवण्यासाठी महापालिका आयुक्त अभिनव गोयल यांनी मंजुरी दिली आहे. तसेच गैरसोयीबाबत रंगकर्मी आणि नाट्यरसिकांनी सहकार्य करावे, असे आवाहन महापालिकेने केले आहे.