मासेमारी बंदी कालावधी ‘जैसे थे’

भाईंदर, ता. २९ (बातमीदार) : पावसाळ्यातील मासेमारीबंदीच्या कालावधीमध्ये १५ ऑगस्टपर्यंत वाढ करण्यात यावी, या मच्छीमारांच्या मागणीची कोणतीही दखल घेण्यात आलेली नाही. मत्स्यव्यवसाय विभागाकडून आगामी मासेमारीबंदीच्या कालावधीसंदर्भात नुकतेच आदेश जारी करण्यात आला आहे. त्यानुसार १ जून ते ३१ जुलै (दोन्ही दिवस धरून) असा मासेमारीबंदीचा कालावधी आहे. या कालावधीत वाढ न झाल्याने मच्छीमारांमध्ये नाराजीचे वातावरण आहे.

समुद्रातील मासळीच्या साठ्यात मुबलक वाढ व्हावी, यासाठी मासेमारीबंदीचा कालावधी १५ ऑगस्टपर्यंत वाढविण्यात यावा, अशी मच्छीमारांची भूमिका आहे. यासंदर्भात एप्रिलमध्ये मच्छीमारांच्या शिष्टमंडळाने मत्स्यव्यवसाय मंत्री नितेश राणे यांची भेट घेऊन कालावधी वाढविण्याबाबत विनंती केली होती. गुजरातमध्येही मच्छीमारांनी हीच भूमिका घेत कालावधी वाढविण्याची मागणी केली होती. त्यानुसार गुजरातमध्ये हा कालावधी १५ सप्टेंबरपर्यंत वाढविण्यात आला आहे. महाराष्ट्रातही बंदीचा कालावधी वाढविण्यात येईल, अशी मच्छीमारांची अपेक्षा व्यक्त केली होती, मात्र ही अपेक्षा फोल ठरली आहे. मासेमारीबंदीच्या आदेशानुसार बंदीचा कालावधी १ जून ते ३१ जुलैएवढाच आहे. आपल्या मागणीचा विचार न झाल्याने मच्छीमारांमध्ये नाराजी आहे.

राज्याच्या सागरी क्षेत्रात (सागरी किनाऱ्यापासून १२ सागरी मैलापर्यंत) यंत्रचलित व यांत्रिक मासेमारी नौकांसाठी ही बंदी लागू करण्यात आली आहे. ही बंदी ही पारंपरिक पद्धतीने मासेमारी करणाऱ्या बिगर यांत्रिक मासेमारी नौकांना लागू असणार नाही. समुद्रात मासेमारीसाठी गेलेल्या सर्व यांत्रिक व यंत्रचलित मासेमारी नौका या १ जूनपूर्वी मासेमारी बंदरात परत येणे बंधनकारक आहे, त्याचप्रमाणे ३१ जुलै व त्यापूर्वी समुद्रात मासेमारीकरिता जाता येणार नाही. सागरीकिनाऱ्यापासून १२ सागरी मैलापुढे खोल समुद्रात मासेमारी जाणाऱ्या नौकांस केंद्र सरकारच्या खोल समुद्रातील मासेमारीबाबतचे धोरण, मार्गदर्शक सूचना व आदेश लागू राहतील.

राज्य सरकारने कालावधीत वाढ करण्यासंदर्भातील कोणतेही आदेश मत्स्यव्यवसाय विभागाला दिले नसल्यामुळे अधिकाऱ्यांनी जुन्या आदेशांनुसार बंदी कालावधीसंदर्भातील आदेश काढले आहेत. यामुळे मच्छीमारांमध्ये तीव्र नाराजी आहे. राज्य सरकारने मंत्रिमंडळाच्या बैठकीत बंदीचा कालावधी वाढविण्यासंदर्भात निर्णय घेऊन तसे आदेश मत्स्यव्यवसाय अधिकाऱ्यांना द्यावेत, यासाठी मच्छीमार पुन्हा एकदा मत्स्यव्यवसाय मंत्री नितेश राणे यांची भेट घेणार आहेत.
- बर्नड डिमेलो, कार्याध्यक्ष, अखिल महाराष्ट्र मच्छीमार कृती समिती