मेंढवन खिंडजवळील अपघातात तिघांचा मृत्यू

मेंढवन खिंडजवळील अपघातात तिघांचा मृत्यू
कासा, ता. ३१ (बातमीदार) : डहाणू तालुक्यातील मेंढवन खिंड परिसरात वाडा-खडकोना येथील अपघाती वळणावर शनिवारी (ता. ३१) सकाळी साडेअकराच्या सुमारास अपघात घडला. यात तिघांचा जागीच मृत्यू झाला असून, दोन प्रवासी गंभीर जखमी झाले आहेत. अपघातानंतर महामार्गावर काही काळासाठी मोठी वाहतूक कोंडी निर्माण झाली होती.
गुजरातहून मुंबईच्या दिशेने भरधाव निघालेली प्रवासी कार मेंढवन खिंडमधील एका तीव्र वळणावर पुढे चाललेल्या कंटेनरवर आदळली. यानंतर मागून आलेल्या दुसऱ्या एका अवजड वाहनाने कारला पाठीमागून जोरदार धडक दिली. या दुहेरी धडकेत कार दोन वाहनांमध्ये चिरडल्याने कारमधील तिघांचा जागीच मृत्यू झाला. ग्लोरिया वेलेस (वय ७३), टायटन वेलेस (वय ४३) आणि खगोलीय वेलेस (वय ४५) अशी मृतांची नावे आहेत तर जखमींमध्ये एका लहान मुलीचा समावेश असून त्यांची नावे अद्याप स्पष्ट झालेली नाहीत. त्यांना तातडीने कासा उपजिल्हा रुग्णालयात नेण्यात आले. दरम्यान, अपघाताची नोंद घेऊन पुढील तपास सुरू असल्याचे पोलिसांकडून सांगण्यात आले आहे.