नव्या वर्षात नवे शिक्षक

सकाळ वृत्तसेवा

नवी मुंबई, ता. ५ ः नव्या शैक्षणिक वर्षानुसार, नवी मुंबई महापालिका शाळा १६ जूनपासून सुरू होणार आहेत; मात्र वर्षानुवर्षे दिसणारे तेच तेच शिक्षक आता शाळेत नसतील. दहा वर्षांपेक्षा अधिक काळ एकाच शाळेत असणाऱ्या शिक्षकांची बदली करण्यात येणार आहे. समुपदेशन करून ही बदली प्रक्रिया पार पडणार आहे; मात्र बदल्यांना माजी महापौर सुधाकर सोनवणे यांनी विरोध केला आहे. शाळा सुरू होण्याच्या तोंडावर बदली केल्यामुळे विद्यार्थी-शिक्षकांमधील भावनिक-आदरयुक्‍त ओळखीवर परिणाम होईल, अशी भीती त्यांनी व्यक्त केली आहे.
महापालिकेच्या शाळांमध्ये पहिली ते दहावी इयत्तेपर्यंत शिक्षण दिले जात असून सुमारे ५० हजारांहून अधिक विद्यार्थी शिक्षण घेत आहेत. प्राथमिक आणि माध्यमिक विभागात नियमित स्वरूपाचे ६६० शिक्षक कार्यरत आहेत; मात्र काही वर्षांपासून हे सर्व शिक्षक एकाच शाळेवर आहेत. एकाच जागी अनेक वर्षे असल्यामुळे शिक्षकांची मक्‍तेदारी वाढत असून भांडण-तंटे होत असल्याच्या तक्रारी नवी मुंबई महापालिकेच्या शिक्षण विभागाला प्राप्त झाल्या आहेत.
वारंवार तक्रारी येत असल्यामुळे काही शिक्षकांच्या बदल्या करण्याची प्रशासनाने तयारी केली होती; परंतु नंतर प्रशासनाच्या लक्षात आले, दहा वर्षे अनेक शिक्षक एकाच शाळेत काम करीत आहेत. काही शिक्षकांची नियुक्ती ज्या शाळेत झाली, आजही ते त्याच शाळेत कार्यरत आहेत.
अखेर दहा वर्षांपेक्षा अधिक काळ एकाच शाळेत काम करणाऱ्या शिक्षकांच्या बदली करण्याचा निर्णय महापालिकेने घेतला आहे. जूनच्या दुसऱ्या आठवड्यात बदली होण्याची शक्यता आहे. बदली झाल्यानंतर नियुक्ती केलेल्या ठिकाणी शिक्षकांना जाणे बंधनकारक असेल.

१९८ शिक्षकांचा समावेश
नवी मुंबई महापालिकेच्या शाळांमध्ये प्राथमिक आणि माध्यमिक वर्गांत एकूण ६६० शिक्षक काम करतात. त्यापैकी १९८ शिक्षक दहा वर्षांपेक्षा अधिक काळ एकाच शाळेत शिकवत असल्याचे प्रशासनाच्या लक्षात आले आहे. अशा शिक्षकांची बदली करण्याची यादी महापालिकेने तयार केली आहे. काही दिवसांतच समुपदेशन करण्यासाठी दिवस निवडला जाणार आहे. त्या दिवशी शिक्षकांना रिक्त जागा दाखवून त्या जागेवर बदली करण्यात येणार आहे.

ज्या शाळांमध्ये शिक्षकांच्या वर्तवणुकीबाबत तक्रार नाही, अशा ठिकाणच्या शिक्षकांच्या बदल्या करू नका. उलट अशा शाळांमधील प्रामाणिक शिक्षकांची बदली करून विद्यार्थी आणि शिक्षकांमध्ये निर्माण झालेली भावनिक घडी विस्कटण्याचे काम होणार आहे. त्यामुळे गुणवत्तेवरदेखील परिणाम होईल. उगीच प्रसिद्धिकरिता अशा बदल्या करीत असल्यास महापालिकेविरोधात आंदोलन करावे लागेल.
- सुधाकर सोनवणे, माजी महापौर, नवी मुंबई महापालिका

एकाच जागेवर दहा वर्षापेक्षा अधिक काळ काम करणाऱ्या शिक्षकांच्या बदल्या केल्या जात आहेत. शिक्षकांच्या बदल्या करताना समुपदेशन केले जाणार आहे. कोणावर अन्याय होणार नाही, याची खबरदारी घेतली जाणार आहे.
- संघरत्ना खिल्लारे, उपायुक्त, शिक्षण विभाग, नवी मुंबई महापालिका